Старшыня Вярхоўнага суда Валянцін Сукала заявіў, што суды мусяць заняцца пераглядам пакаранняў па некаторых катэгорыях крымінальных справаў за злачынствы, звязаныя з наркотыкамі. Пра гэта Сукала заявіў у інтэрв’ю «Беларусь-1».
Ён адзначыў, што суды бачаць сваю задачу ў пэўнай гуманізацыі выкарыстання нормаў дзейнага заканадаўства.
«Мы цяпер працуем над аптымізацыяй і змякчэннем адказнасці за эканамічныя злачынствы. Я думаю, што мы цяпер павінны актыўна займацца і пераглядам ужывання закона па некаторых наркатычных артыкулах, дзе былі змененыя ніжнія межы санкцыяў. Мы таксама пераглядаем гэтыя выракі па некаторай катэгорыі справаў. Ну і наагул уся наша дзейнасць накіраваная на інтарэсы людзей, каб сапраўды абараніць і зберагчы кожнага чалавека, без патрэбы не скіроўваючы ў месцы пазбаўлення свабоды. Мы ўсё робім для таго, каб зрабіць практыку прызначэння пакаранняў эфектыўнай, не абавязкова карнай і рэпрэсіўнай», – падкрэсліў ён.
Акрамя таго, Аляксандр Лукашэнка 23 снежня даручыў падрыхтаваць законапраект аб амністыі да Дня Перамогі 9 траўня. Сукала ў інтэрвʼю адзначыў, што «гэтая амністыя па сваім ахопе будзе аналагічнай папярэдняя амністыі», што была прымеркавана да Дня незалежнасці 3 ліпеня. Нагадаем, тады былі вызваленыя каля 2 тысяч чалавек.
ІІ belsat.eu