Ва Украіне выкрылі расейскую агентурную сетку і затрымалі яе кіраўніка


Расейскія жаўнеры без апазнавальных знакаў у Крыме 9 сакавіка 2014 года. Крыніца – wikipedia.org

У Мікалаеўскай вобласці Украіны выкрылі агентурную сетку расейскай ваеннай разведкі і спынілі яе дзейнасць. Пра гэта заявілі прадстаўнікі дэпартамента контрвыведкі Службы бяспекі Украіны на брыфінгу ў чацвер, перадае УНІАН.

Паводле СБУ, 20 снежня ўкраінскія сілавікі затрымалі кіраўніка гэтай агентурнай сеткі – грамадзяніна Украіны 1961 года нараджэння, капітана 1 рангу Узброеных сіл Украіны ў запасе, які адначасова мае расейскае грамадзянства.

«Ён быў завербаваны кадравым супрацоўнікам Галоўнага ўпраўлення Генштаба УС РФ у Севастопалі і неаднаразова выязджаў у анексаваны Крым для правядзення агентурных сустрэч», – заявіў прадстаўнік контрвыведкі.

Па заданні расейскай спецслужбы былы старэйшы марскі афіцэр і яго памагатыя ажыццяўлялі збор і перадачу інфармацыі з абмежаваным доступам пра функцыянаванне ваенных падраздзяленняў на тэрыторыі Ачакаўскага гарнізона Мікалаеўскай вобласці, а таксама іх прыцягненні да правядзення Аперацыі аб’яднаных сілаў на ўсходзе Украіны.

Супрацоўнікі СБУ таксама правялі ператрус па месцы жыхарства меркаваных агентаў і выявілі там доказы супрацы з расейскімі спецслужбамі – звесткі з абмежаваным доступам захоўваліся на кампʼютарах і флэшках.

КА, belsat.eu

Глядзі таксама
Каментары