Украінская паліцыя раскрыла маштабную сетку продажу на рынку ў Чарнаўцах кантрафактных малака, сыра і масла з этыкеткамі беларускіх вытворцаў. Падчас праверкі ў харчах знайшлі сальманелу і кішачную палачку.
Дапамогу ў продажы псеўдабеларускіх малочных харчоў на кірмашы ў Чарнаўцах злачынцам аказваў адзін з мясцовых чыноўнікаў, распавялі агенцтву «УНІАН» у Галоўным упраўленні паліцыі Чарнавіцкай вобласці.
Паводле звестак паліцыі, злачынная група зарганізавала прадукцыю няякаснага сыру і масла на прыватным малочным заводзе па-за межамі Чарнаўцоўскай вобласці.
«Пасля транспарту ў Чарнаўцы няякасную прадукцыю фасавалі ўва ўпакоўку гандлёвых марак Рэспублікі Беларусь. Продаж падробленых тавараў ажыццяўляўся праз індывідуальных прадпрымальнікаў на адным з Чарнавіцкіх рынкаў», – паведамілі ў паліцыі.
Штомесяц злачынцы прадавалі 60 тонаў псеўдабеларускіх малочных харчоў на суму каля $ 345 000.
Падчас вобшуку на заводах і на складах паліцыянты канфіскавалі каля сямі тонаў сыру, чатыры тоны сметанковага масла, больш за 600 кг спрэдаў, а таксама этыкеткі і ўпаковачныя матэрыялы беларускіх гандлёвых марак.
Падчас праверкі эксперты Чарнавіцкага абласнога навукова-вытворчага цэнтру стандартызацыі, метралогіі і сертыфікацыі выявілі, што падробленая прадукцыя не адпавядае патрабаванням дзяржаўных стандартаў Украіны і ўтрымлівае сальманелу і кішачную палачку.
«Ужыванне гэткіх харчоў уяўляе непасрэдную пагрозу для здароўя і жыцця чалавека», – дадала паліцыя.
Паліцыя распачала крымінальную справу паводле артыкулаў аб махлярстве і атрыманні чыноўнікам выгады.
ДД belsat.eu