У Менгарвыканкаме адказалі на зварот назіральнікаў адносна таго, што ў Менску істотна скарацілася колькасць месцаў для перадвыбарчай агітацыі. Пра гэта паведамляюць «Праваабаронцы за свабодныя выбары».
Назіральнік Аляксей Лойка звярнуўся ў Менгарвыканкам з просьбай змяніць рашэнне аб вызначэнні ў Менску месцаў для агітацыі. Ён адзначыў, што ў Фрунзенскім раёне ў параўнанні з выбарамі 2015 года колькасць месцаў для сходаў у памяшканнях скарацілася амаль у сем разоў (з 54 да 8), колькасць стэндаў для размяшчэння агітацыйных друкаваных матэрыялаў – у тры разы (з 61 да 21), а для правядзення агітацыйных мітынгаў і пікетаў засталося толькі адно месца – стары Тучынскі сквер.
Назіральнік лічыць сквер непрыдатным для сходаў колькасцю больш за 1000 чалавек з прычыны наяўнасці вадаёма і вялікай колькасці дрэваў.
На гэта намеснік старшыні Менгарвыканкаму Арцём Цуран адказаў, што «рашэнне Менгарвыканкаму аб вызначэнні месцаў для агітацыі ў горадзе не змяшчае прынцыпова новых падыходаў да прававога рэгулявання ў гэтай сферы грамадскіх стасункаў». Ён адмовіўся пераглядаць рашэнне аб вызначэнні ў Менску месцаў для агітацыі, і пакінуў усё, як ёсць.
Аляксей Лойка звярнуўся ў суд Маскоўскага раёну Менску са скаргай на такі адказ.
Паводле яго, адзінае месца для агітацыі на паўмільённы раён робіць немагчымым захаванне прынцыпу роўнасці кандыдатаў. Гэтак, калі два кандыдаты заплануюць правесці перадвыбарчы мітынг у адзін і той жа час у скверы «Тучынскі», «правядзенне мітынгу будзе арганізоўвацца паводле прынцыпу чаргі, што супярэчыць прынцыпу роўнасці кандыдатаў у прэзідэнты», мяркуе назіральнік.
МГ belsat.eu
