У Менску судзяць маладзёнаў, якія распісалі шчыты АМАПу. Дзяўчыне інкрымінуюць «абразу прэзідэнта»
Ціхан Клюкач і Сафія Малашэвіч могуць атрымаць да 6 гадоў за тое, што 6 верасня распісалі балончыкамі з фарбаю шчыты сістэмы «Рубеж».
У судзе Кастрычніцкага раёну Менску сёння праходзіць першае паседжанне ў разглядзе крымінальнай справы супраць навучэнцаў Каледжу сферы абслугоўвання Сафіі Малашэвіч і Ціхана Клюкача за тое, што маладзёны распісалі шчыты сістэмы «Рубеж». Іх вінавацяць у «рыхтаванні масавых закалотаў», а дзяўчыну – яшчэ і ў публічнай абразе прэзідэнта.
Паводле пракурора, Сафія «наўмысна і супрацьпраўна» дэманстравала плакат з надпісам, які ў зневажальнай форме «абразіў дзейнага прэзідэнта Лукашэнку», піша радыё «Свабода». Паводле матэрыялаў справы, Малашэвіч не рэагавала на заклікі працаўнікоў праваахоўных органаў, «брала ўдзел у масавым упартым і бесперапынным парушэнні грамадскага парадку».
Падчас допыту Ціхан Клюкач заявіў, што яны наўмысна выходзілі на акцыі пратэсту, каб акрэсліць сваю грамадзянскую пазіцыю.
Праваабаронцы прызналі Сафію Малашэвіч і Ціхана Клюкача палітычнымі вязнямі.
ДР belsat.eu
