17- і 18-гадовых маладзёнаў з Дзяржынскага раёну затрымалі на вуліцы Шаранговіча ў беларускай сталіцы, калі яны рабілі чарговую закладку.
Паводле менскай міліцыі, юнакі каля месяца працавалі ў інтэрнэт-краме па продажы псіхатропаў. Яны рабілі закладкі ва ўсіх раёнах Менску.
Фасавалі рэчывы дома, а развозілі тавар у арэндаваным аўце. У ім сілавікі выявілі заплечнік, у якім знаходзілася 180 закладак парашку з альфа-PVP вагой каля 80 грамаў.
Сталічныя праваахоўнікі адзначаюць, што цягам месяца хлопцы паспелі зрабіць каля 100 закладак.
За распаўсюд наркотыкаў маладым людзям можа пагражаць да 15 гадоў турмы.
Паводле праваабаронцаў, у Беларусі за распаўсюд і захоўванне наркотыкаў асуджаныя больш 16 000 чалавек. Сваякі асуджаных сцвярджаюць, што следства нярэдка не вывучае істотныя акалічнасці, якія маглі б паўплываць на рашэнні судоў.
ДР belsat.eu
