У сталіцы перакрылі рух транспарту па вул. Янкі Купалы на кавалку ад вул. Максіма Багдановіча да вул. Куйбышава і абмежавалі рух па вул. Багдановіча, пакінуўшы адну паласу ў кожным кірунку. Будуць пашыраць праезную частку і заменяць камунікацыі.
Будаўнічыя працы пачаліся раніцай 23 лютага і праз слой асфальту паказаліся камяні – брукаванка, якая была на сучаснай вуліцы Багдановіча яшчэ ў 50-х гадах мінулага стагоддзя, у тыя ж часы тут яшчэ хадзілі трамваі.
Кавалкі брукаванкі выглядваюць паўсюль, а на перакрыжаванні вуліц іх вялізарная куча, на якой стаіць экскаватар.
«Камяні мы не дастаем, пакідаем іх на месцы, потым пакладзем асфальт і каток утрамбуе іх назад», – кажуць рабочыя.
Яны ж паведамляюць, што рэйкі трамвайных шляхоў дасталі яшчэ раней, недзе ў 60-х гадах, і зараз нічога з гэтага не знаходзяць.
Асноўная праца заключаецца ў замене ўсіх камунікацыяў: цеплатрасы, газаправода, а таксама ліўневай каналізацыі. Гэта можа вырашыць пытанне са скопішчам вады падчас дажджоў.
Таксама на вуліцы Багдановіча дададуць адну паласу для транспартнага руху – такім чынам іх будзе шэсць. Расшырэнне закране і вуліцу Я. Купалы.
Зараз ідуць працы ўздоўж былой 2-й больніцы. Усе сеткі, якія залягаюць на тэрыторыі пашырэння, будуць вынесены бліжэй да будынку больніцы, пад зону будучага тратуару. Ужо ўсталёўваюць новыя апоры для камунікацыяў і разабралі пакрыццё тратуару.
Рабочыя пацвердзілі, што арыентавана рэстаўрацыйныя працы будуць скончаныя напрыканцы траўня.
Дзеля таго, каб скараціць тэрмін выканання, дзяржаўнае прадпрыемства «Дзярждарбуд» будзе весці будаўнічыя працы кругласутачна. Рабочыя кажуць: каб стала лепей, трэба пачакаць. Але пакуль відавочна, што ўжо ў панядзелак нас чакаюць заторы і шмат негатыву з боку кіроўцаў.
ВР, фота аўтара/Belsat.eu