Затрыманні ў межах крымінальных справаў за падзеі 14 ліпеня ў Менску працягваюцца, паведамляе праваабарончы цэнтр «Вясна».
Па стане на 29 ліпеня праваабаронцы ведаюць, што ў межах крымінальных справаў затрыманыя прынамсі 13 чалавек. Крымінальныя справы распачатыя паводле артыкулаў 363 (супраціўленне супрацоўніку органаў унутраных спраў), 364 (гвалт у дачыненні да супрацоўніка органаў унутраных спраў), 342 (арганізацыя і ўдзел у парушэнні грамадскага парадку, спалучаных з відавочным непадпарадкаваннем законным патрабаванням супрацоўнікаў органаў унутраных спраў) КК.
«Вясна» таксама публікуе спіс затрыманых:
Таксама праваабаронцам «Вясны» вядома, што затрыманыя яшчэ прынамсі чатыры чалавекі.
14 ліпеня ЦВК адмовіўся рэгістраваць у якасці кандыдатаў на прэзідэнта Віктара Бабарыку і Валерыя Цапкалу. У тэлеграм-каналах пасля гэтага з’явіліся заклікі а 19-й выходзіць на галоўныя вуліцы беларускіх гарадоў, каб выказаць пратэст супраць дзеянняў улады. У адказ сілавікі часткова перакрылі рух у цэнтры Менску і распачалі масавыя адвольныя затрыманні людзей, што былі ў той час на вуліцах. Толькі ў Менску былі затрыманыя больш за 300 чалавек.
У некаторых кропках гораду жорсткія дзеянні міліцыі выклікалі супраціў з боку людзей, адбыліся сутычкі з АМАПаўцамі. МУС сцвярджае: 6 міліцыянтаў атрымалі пашкоджанні, чатыры з іх былі шпіталізаваныя.
Міжнародная праваабарончая арганізацыя Amnesty International у сваёй заяве адзначыла, што празмернае выкарыстанне сілы міліцыяй выклікала «бурную рэакцыю з боку некаторых пратэстоўцаў», аднак мітынгі ўсё роўна заставаліся ў асноўным мірнымі. Паводле праваабаронцаў, «любы, хто затрыманы проста за мірныя пратэсты ў Менску або іншых гарадах, з’яўляецца вязнем сумлення і павінен быць неадкладна і безумоўна вызвалены».
МГ belsat.eu