У БПЦ патлумачылі, чаму не пазбавілі сану святара Бурыкіна, якога вінавацяць у згвалтаванні дачкі
Прэс-сакратар Беларускай праваслаўнай царквы Сяргей Лепін патлумачыў, чаму Канстанцін Бурыкін, вядомы як «бацюшка са свастыкай», не пазбаўлены сану. Адпаведнае пытанне пра гэта задаў у «Facebook’у» сакратар Грамадзкай назіральнай камісіі аховы помнікаў пры Міністэрстве культуры Павал Каралёў.
«Сапраўды, на дадзены момант Бурыкін не пазбаўлены сану, а забаронены ў святарскім служэнні, бо артыкул, паводле якога ён асуджаны, не ўтрымлівае ў сабе кананічнага злачынства, якое прадугледжвае такую меру ўздзеяння. Проста за факт захоўвання ржавага востава пісталеціка і патрона не ад яго не пазбаўляюць сану. Абставіны справы не трымаюць магчымасці асуджэння Бурыкіна завочна, без ягонай прысутнасці на царкоўным судзе», – адзначыў Лепін.
Нагадаем: у 2017 годзе суд Заводскага раёну Менску прызнаў святара Канстанціна Бурыкіна вінаватым у незаконным захоўванні зброі і боепрыпасаў і асудзіў да трох гадоў пазбаўлення волі ў калоніі ўзмоцненага рэжыму. Вясной міліцыя распавяла пра новую крымінальную справу ў дачыненні да «бацюшкі са свастыкай» паводле яшчэ аднаго артыкулу: згодна з версіяй следства, ён, будучы ў 2014-2016 гадах намеснікам кіраўніка Беларускай федэрацыі паўэрліфтынгу, выдаткаваў на ўласныя патрэбы частку грошай, якая прызначалася на камандзіроўкі спартоўцам. Шкоду ацанілі ў 17,5 тысячы рублёў. На гэтым тыдні намеснік генпракурора Аляксей Стук паведаміў, што пра трэцюю справу: Бурыкіна вінавацяць у «гвалтоўных дзеяннях сексуальнага характару ў дачыненні заведама малагадовай асобы». Пацярпелай па справе з’яўляецца ягоная дачка – паводле следства, Бурыкін гвалтаваў дзяўчыну ў перыяд з 2012 да 2016 года (дачка 1999 года нараджэння).
Прадстаўнік БПЦ адзначае, што «сана не пазбаўляюць на падставе патрабаванняў блогераў і журналістаў, калі тыя ва ўстаноўленым парадку не дакажуць свае абвінавачванні ў злачынствах, якія патрабуюць такую меру».
«Па пытанні гвалту малалетніх – толькі праз грамадзянскі суд», – дадаў Лепін.
Прэс-сакратар адзначыў, што Царква не валодае ўласным судом і сродкамі дазнання па крымінальных справах для духавенства, і сама не праводзіць следства.
«На час следства клірыкі заўсёды забараняюцца ў святадзействе – да высвятлення абставінаў і рашэння суда. Калі ва ўстаноўленым законам парадку будзе даказаная віна Бурыкіна ў згвалтаванні малалетняй дачкі, то яго пазбавяць сану. Як паказвае практыка правапрымянення, па такіх абвінавачваннях рашэнне аб пазбаўленні сану можа быць вынесена і ў адсутнасці абвінавачанага клірыка на царкоўным судзе – завочна», – тлумачыць Лепін.
Што датычыць свастык, якія засталіся на целе Бурыкіна, то, паводле Лепіна, яны «з’яўляюцца вынікам яго ранейшага жыцця, у якім ён раскаяўся і прыхільнасць да якога больш не выяўляў». «У адваротным выпадку, пропаведзь нацызму сапраўды магла б стаць падставай для пазбаўлення яго сану. Але за тое, што магло быць, і невядома, ці было, а, значыць, не было, сану не пазбаўляюць», – дадаў прадстаўнік БПЦ.
ІІ belsat.eu
