«Цяжка толькі першыя 3 дні». Актывісткі Матчынага руху 328 пачалі галадоўку

16 ліпеня дзве актывісткі руху маці пачалі галадоўку. У найбліжэйшыя дні да іх далучацца іншыя ўдзельніцы руху. Жанчыны змагаюцца за справядлівыя прысуды і змяншэнне тэрмінаў зняволення паводле вядомага наркатычнага артыкулу № 328 Крымінальнага кодэксу.

Фота: Таня Капітонава / Belsat.eu

Руху «Маці 328» 16 ліпеня спаўняецца 5 гадоў. За гэты час яны правялі мноства акцый і перамоваў з дэпутатамі Палаты прадстаўнікоў. Ім удалося паменшыць тэрміны некаторых людзей на 2 гады.

Фота: Таня Капітонава / Belsat.eu

Маці галадаюць ужо трэці раз. Пачынаюць дзве жанчыны – Ала Берналь і Алена Кузьміна. Затым да іх далучацца іншыя ўдзельніцы руху.

Алена Кузьміна, маці асуджанага. Ейны сын асуджаны па артыкуле 328, частка 3. Сёння яна пачала галадоўку. Фота: Таня Капітонава / Belsat.eu

«Мы чарговы раз у глыбокім роспачы з-за таго, што ўвага ўладаў праходзіць міма нас – маці, чыіх дзяцей асудзілі па артыкуле 328. Асабліва жорсткая 4 частка гэтага артыкула, у якой у злачынстве нібыта ўдзельнічае група асоб. Але часта ў справах няма ніякіх груп і дзеці сядзяць паасобку на лаве падсудных. Па гэтай частцы тэрміны бываюць да 18 гадоў. Нашы дзеці, асуджаныя па 4 частцы артыкула 328, сядзяць па 14, 15, 16, 17 гадоў. За гэты час можна зламаць жыццё не толькі дзяцей, але і іх бацькоў», – кажа Алена.

Фота: Таня Капітонава / Belsat.eu

«Наркотыкі не сканчаюцца, калі дзяцей саджаюць. А дэкрэт №6 змагаецца не з наркотыкамі, а з наркаманамі – тымі, каму патрэбны курс рэабілітацыі. Мы ў роспачы і аб’яўляем новую галадоўку, таму што патрабуем перакваліфікацыі спраў па артыкуле 328. Мы не кажам, што нашы дзеці не вінаватыя. Мы ведаем усе дробязі, якія датычныя артыкула 328. Яны вінаватыя, але не на такія тэрміны», – працягвае Алена Кузьміна.

Ала Берналь, маці асуджанага. Сёння яна пачала галадоўку. Фота: Таня Капітонава / Belsat.eu

«Нашы дзеці – маладыя ініцыятыўныя людзі, якія могуць зрабіць вельмі многае ў жыцці, а ў турме яны пазбаўленыя такой магчымасці», – кажа Ала.

Фатаграфіі некаторых дзяцей, асуджаных паводле артыкула 328 КК РБ. Фота: Таня Капітонава / Belsat.eu
Фатаграфіі дзяцей, якія ўжо выйшлі на волю. Камень сімвалізуе турму. Фота: Таня Капітонава / Belsat.eu
Адлік дзён, якія маці збіраюцца трымаць галадоўку. У першы раз яны вытрымалі 14 дзён, у другі – 22 дні. Фота: Таня Капітонава / Belsat.eu
На талерках напісаны імёны дзяцей. Па радзе знаёмага псіхолага, жанчыны садзяцца за стол і так у думках звязваюцца са сваімі дзецьмі. Фота: Таня Капітонава / Belsat.eu
Маці моляцца кожны дзень за сваіх дзяцей. Кветкі як сімвал вечнага агню. На заднім плане стаіць сумка, у якой маці возяць перадачы ў турму. Фота: Таня Капітонава / Belsat.eu
Тэрміны, якія далі дзецям. Фота: Таня Капітонава / Belsat.eu
У некаторых асуджаных дзяцей ёсць свае дзеці, якіх яны не могуць выхоўваць з-за сваіх велізарных тэрмінаў. Калыска і цацкі сімвалізуюць тое, што іх чакаюць дадому. Фота: Таня Капітонава / Belsat.eu
Неўстаноўленая асоба – самы галоўны вораг артыкула 328. Ва ўсіх справах ёсць «неўсталяваныя асобы», якія ўцягнулі асуджаных у наркабізнес. Але дзяржава не збіраецца іх «усталёўваць». Фота: Таня Капітонава / Belsat.eu
Сцяжкі як маякі, якія паказваюць дзецям шлях дадому. Фота: Таня Капітонава / Belsat.eu
Фота: Таня Капітонава / Belsat.eu

Акцыя праходзіць у вёсцы, дзе летам жыве Алена Кузьміна. Суседзі ставяцца да яе дзейнасці станоўча і часам прапануюць дапамогу.

Іна Джумава. Фота: Таня Капітонава / Belsat.eu

«Мой сын Антон сядзіць у турме, дзе нечалавечыя ўмовы для жыцця. Яго нават пазбаўляюць адзінага званка са мной раз у месяц. Я не бачыла яго 3 гады. Ён кажа, што моцна схуднеў: скура абцягвае яго косткі. Хутка будзе 6 гадоў, як ён сядзіць», – распавядае Іна Джумава.

Людміла Ждановіч. Фота: Таня Капітонава / Belsat.eu

«Дзякуючы нашаму руху, некаторыя дзеці вызваліліся раней. У тым ліку мой сын. Праз два дні будзе 7 месяцаў, як ён дома. Я прыйшла на гэтую акцыю, таму што хачу падтрымаць маці, чые дзеці знаходзяцца ў турме да гэтага часу. Тое, што адбываецца сёння ў краіне, – гэта свядомае знішчэнне здаровай нацыі. Нельга такім варварскім спосабам знішчаць уласны народ», – кажа Людміла Ждановіч.

Людміла паказвае на фотаздымак свайго сына Аляксея, які ўжо на волі. Фота: Таня Капітонава / Belsat.eu
Маці глядзяць у бінокль: на даляглядзе стаяць дзве падазроныя машыны. Сюды ўжо некалькі разоў прыязджалі з ператрусамі. Фота: Таня Капітонава / Belsat.eu
Машыны на гарызонце. Фота: Таня Капітонава / Belsat.eu

Небяспеку таксама ўяўляе артыкул 411 КК РБ. Па ім могуць асудзіць зняволеных, калі ў іх у камерах знойдуць, напрыклад, пыл. З-за гэтага павялічваюцца тэрміны, якія могуць дайсці нават да пажыццёвага зняволення. Актывісткі руху «Маці 328» хочуць, каб гэты артыкул цалкам ліквідавалі.

Таня Капітонава, фота аўтара Belsat.eu

Hавiны