Усё ўжо «кулуарныя» вылівання старшыні беларускага цырка абмеркавалі і пракаментавалі? Значыць, мая чарга.Калегі, а што здарылася? Што новага Лідзія Міхайлаўна вам сказала? Фактычна пераказаныя нарматыўныя акты, якія мы з вамі ведаем і без яе. Але шуму ж, шуму ж колькі!
І не Ярмошына ў дадзеным выпадку вінаватая. Яна паводзіць сябе так, як і належыць разумнаму і іранічна сезоннаму ньюсмэйкеру. Яе «сезон» завяршыўся разам з выбарчай кампаніяй. Цяпер ёй самой пра будучыню нічога не вядома – даты, тэрміны, тэмы і іншае. Але да яе падышоў натоўп журналістаў, узрадаваўшыся, што ёсць, з кім пагаварыць. Уключылі дыктафоны. І старшыня ЦЫРК, строга застаючыся ў рамках сваёй кампетэнцыі, адказала на зададзеныя ёй пытанні.
А далей здарылася тое, што здарылася. Журналіст замест таго, каб ужыць звычайную фармулёўку «Адказваючы на нашае пытанне, старшыня Цэнтральнай і г.д.», вырашыў надзьмуць шчокі і надаць вагі такой цяжка «здабытай» інфармацыі. У выніку атрымалася: «У кулуарах сесіі Лідзія Ярмошына заявіла…»
І тут Астапаў панесла. Не Астапаў нават – хлестакоўскія трыццаць тысяч кур’ераў кінуліся па рэдакцыях з лямантам: «Уяўляеце! У кулуарах сесіі!!! Лідзія Ярмошына!!!»
Не, усё правільна. Круцейшы эксклюзіў атрымаўся. Уяўляеце: сядзіць у буфеце Палаты Прадстаўнікоў натоўп журналістаў, каву спажывае, а тут да іх падкрадаецца адна з высокіх службовых асоб і пад страшным сакрэтам, пры ўключаных дыктафоне пачынае заяўляць…
Калегі, прафесіяналізм з вас так і прэ, так і прэ…
«У кулуарах» – гэта калі асоба, якая пажадала застацца невядомай, без дыктафона паведамляе выключна вам аднаму пра дату будучага рэферэндуму.
Гэта калі вы прабіліся да прэзідэнта, абыходзячы кардоны і Эйсмант, і ён кажа:
– Добра. Толькі для парталу «Там.Бай-Бай». Будзе ўведзеная змяшаная сістэма выбараў. Праз, зразумела, рэферэндум. Можаш напісаць.
Гэта – «у кулуарах». А так – навошта ж людзей палохаць?
Пры гэтым не магу не захапіцца Лідзіяй Ярмошынай. Трэба бо ўмець выкарыстоўваць у мэтах уласнага піяру прафесійныя журналісцкія недахопы так, каб нічога не сказаць – а кожная сабака ў двары цябе цытавала. Ці – не сабака. Коцік.
Дарэчы, імя Лідзіі Ярмошынай вынесенае ў загаловак выключна для прыцягнення ўвагі чытачоў. Не посціць жа на самай справе коціка?!
Аляксандр Фядута, belsat.eu
Рэдакцыя можа не падзяляць меркавання аўтара.
