У панядзелак 2 лістапада Следчы камітэт Беларусі паведаміў, што пасля нядзельнай акцыі ў Менску «Дзяды» узбуджана крымінальная справа за арганізацыю дзеянняў, якія груба парушаюць грамадскі парадак (арт. 342 КК РБ). Падазраванымі па гэтай справе адразу прызнаны ажно 231 чалавек. Следчыя дзеянні і аператыўна-вышуковыя дзеянні працягваюцца, паведамляе СК. Старшыня Праваабарончага цэнтру «Вясна» Алесь Бяляцкі выказаўся з нагоды новай маштабнай крымінальнай справы.
Следчы камітэт не ўзбудзіў ніводнай крымінальнай справы па сотнях і сотнях заяў, пададзеных ад нашых грамадзянаў.
Адначасова, 2 лістапада Следчы камітэт узбудзіў крымінальную справу па крымінальным артыкуле 342, які стаў вельмі папулярным ва ўладаў з гэтага лета, за, як быццам бы, арганізацыю і падрыхтоўку дзеянняў, якія груба парушаюць грамадскі парадак.
Беспрэцэндэнтная колькасць падазроных па гэтай справе – 231 чалавек з тых, што былі затрыманыя падчас маршу на Курапаты. Улады перакрочылі мяжы логікі і сэнсу.
Масавыя злачынствы супраць беларускага народу працягваюцца.
Упершыню з 1988-га году было разагнана народнае шэсце ў дзень памяці продкаў Дзяды. Былі груба парушаны, затаптаныя ў бруд народныя традыцыі, этыка і звычайная чалавечая прыстойнасць.
Супраць мірных дэманстрантаў выкарыстоўваліся спецсродкі, іх абстрэльвалі гумовымі кулямі, у іх кідалі светлашумавыя гранаты, іх беспадстаўна збівалі пры затрыманні, над імі здзекаваліся падчас транспартавання ў аддзелы міліцыі.
Відавочна, што загад на гвалт і на ўзбуджэнне гэтай мегакрымінальнай справы быў аддадзены з самага верху.
Парушэнні правоў чалавека ў краіне дасягнулі нябачных дагэтуль маштабаў. Такога ў гісторыі Беларусі не было са сталінскіх часоў. Супраць народу ўлады развязалі сапраўдны тэрор.
Беларусь хутка скачваецца ў свірэпы таталітарызм.