«Знайшлося двое ахвотных, толькі за грошы і адгулы». Праўладны мітынг адмянілі «праз каронавірус»
На гэтыя выходныя ўлады планавалі сабраць грандыёзны мітынг, на які зганялі працаўнікоў дзяржпрадпрыемстваў з усёй краіны, аднак у выніку адмянілі акцыю. На стэле, плошчы Незалежнасці і Кастрычніцкай плошчы праводзілі падрыхтоўчыя працы, мантаж адмысловай сцэны, але 23 кастрычніка пачалі ўсё разбіраць.
Сёння Аляксандр Лукашэнка заявіў, што ён не прыхільнік правядзення «маштабнага мітынгу». Паводле яго, з усёй краіны на мерапрыемства выказалі жаданне прыбыць каля 250–300 тысячаў чалавек, але з прычынаў бяспекі ён супраць збору людзей. Яшчэ адна афіцыйная прычына – каронавірус.
Верыцца ў такое тлумачэнне з цяжкасцю, бо да апошняга чыноўнікаў не бянтэжылі дадатковыя цягнікі з абласных цэнтраў і спецыяльна арандаваныя аўтобусы, якія меліся звазіць удзельнікаў мітынгу ў сталіцу. Ініцыяваў правядзенне мітынгу кіраўнік Федэрацыі прафсаюзаў Беларусі Міхаіл Орда. Ён заклікаў прыходзіць на акцыю, каб «паказаць, хто сёння ў краіне кіраўнік». Хутчэй за ўсё, улады зразумелі, што масавасці на імпрэзе чакаць не варта – большасць, нягледзячы на пагрозу звальненняў і прапанаваныя адгулы, адмаўлялася ад удзелу.
Рабочыя, якія цяпер разбіраюць дэкарацыі да лукашэнкаўскага мітынгу, сказалі карэспандэнту «Белсату» наступнае:
«Нічога не будзе праз каронавірус. Учора яго не было, а сёння ёсць! Ноччу ставілі сцэну, а цяпер збіраем назад».
«Далі адбой, прычынаў не патлумачылі»
Адмяніць збор працаўнікоў ля стэлы – такое распараджэнне атрымала адна з дзяржаўных сетак грамадскага харчавання, якая мелася абслугоўваць імпрэзу.
«Далі каманду «адбой», прычынаў не называюць. Ходзяць чуткі, што баяцца зліцця двух мітынгаў у адзін», – паведамляе крыніца belsat.eu на прадпрыемстве. Што цікава, раней працаўнікі сеткі атрымалі каманду рыхтавацца да імпрэзы загадзя – з 2-й гадзіны ночы з суботы на нядзелю.
Паводле нашай крыніцы, кіраўніцтва вельмі педантычна падышло да ўкладання святочнага меню.
«Даходзіла да маразму. Кожны пункт меню ўхвалялі зверху. Возьмем бутэрброд з салам і гурком. Кіраўніцтва не задаволіла мясная праслойка. Загадалі выразаць мяса, бо інакш сала нагадвала бел-чырвона-белы сцяг. Любы намёк на бел-чырвона-белыя колеры забаронены».
Пры тым большасць працаўнікоў адмаўлялася ісці на кірмаш, матывуючы гэта захадамі бяспекі.
«Кіраўніцтва разумее, што людзі незадаволеныя і не хацелі туды ісці. Ім гаварылі «прыходзьце адпачыць», дазволілі нават піць алкаголь. Вядома, неафіцыйна. Адным словам, пейце, ежце, танчыце, але работнікі сказалі, што гэта небяспечна. Маўляў, як мы будзем глядзець у вочы людзям? А калі прыйдуць з іншага мітынгу? Ім сказалі, што будуць ахоўваць, будуць спецыяльна навучаныя людзі. Хто – не ўдакладнілі».
«Знайшлося 2 чалавекі, толькі за грошы і адгулы»
Ахвотных паўдзельнічаць у праўладным мітынгу збіралі ў менскай арганізацыі «Белліфт» – за адгул ці дадатковую аплату. Аднак сёння раніцаю прайшла нарада ў выканкаме, пасля якой дырэктар па ідэалогіі паведаміў працаўнікам, што ўсё адмяняецца.
«Дзякуй за ўдзел у падрыхтоўцы да правядзення нядзельнага мерапрыемства, з пэўных прычынаў удзел нашага прадпрыемства скасоўваецца, усё адмяняецца». Учора ўсім паведамілі, што з кожнай брыгады трэба 1–2 чалавекі (за адгул і аплату), усё гэта гаварылася ў вуснай форме.
Бліжэй да канца дня з аднаго ўчастку знайшлося 2 чалавекі, толькі за грошы і адгулы (гэта 100 %). На астатніх участках – такая ж статыстыка. Рабочыя ў большасці адмовіліся», – напісаў нам чытач.
36 вагонаў і АМАП у дадатак
У рэдакцыю звярталіся чыгуначнікі з Магілёва, Горадні ды Віцебску. Паводле іхнае інфармацыі, на выходныя з кожнага з абласных цэнтраў планавалі па два дадатковыя цягнікі – 18 вагонаў кожны.
«У кожным вагоне – 40 месцаў мінімум. Нам сказалі пра тое, што едзем, – толькі ўчора ўвечары. Адмовіцца не далі, паставілі перад фактам, маўляў, «трэба было раней думаць». Змушаюць працаваць тых, у каго выходны. Прыходзіцца пераступаць праз сябе. Таксама нам сказалі, што з намі паедзе АМАП, але навошта – не тлумачылі», – распавядае нам працаўнік чыгункі з Горадні.
Паводле яго, настроі ў калектыве няўхвальныя. Брыгада адмаўлялася фармаваць склад цягніка, бо ўсе выступаюць супраць.
«Каронавірус іх не непакоіў. Прэміяў і даплатаў нават не прапаноўваюць. Сёння паступіла інфармацыя, што рэйсы адмяняюць. Увесь калектыў усцешаны».
«На мітынг ідуць 5–6 чалавек – жонкі сілавікоў»
На мітынг за Лукашэнку збіралі выхавальнікаў дзіцячых садкоў. У чацвер, паводле крыніцаў «Белсату», у Менску адбыўся сход усіх загадчыкаў дзіцячых садоў сталіцы.
«Пасля загадчыца дзіцячага садка № 565 у Фрунзенскім раёне сабрала ўсіх работнікаў і сказала, што ўсе ў абавязковым парадку мусяць у нядзелю выйсці на праўладны мітынг. Пагражалі звальненнем. Калектыў падзяліўся 50 / 50: тых, хто адкрыта адмовіліся ісці, і тых, хто думае гэтак жа, але баіцца сказаць.
На мітынг планавалі ісці прыкладна 5–6 чалавек – жонкі работнікаў сілавых структураў. Таксама загадчыца сказала, што калі ёсць маленькія дзеці, якіх няма з кім пакінуць, можна ўзяць дзяцей з сабою», – напісаў нам адзін з працаўнікоў установы.
Аднак пакуль ніхто афіцыйна інфармацыі працаўнікам не даваў – трэба ім ісці на мітынг альбо не.
- Паведамленні пра прымусовы ўдзел у пралукашэнкаўскіх акцыях у Менску прыходзілі ад чытачоў цягам апошніх дзён дзясяткамі з усёй краіны – ад выхавальніц садкоў, студэнтаў, працаўнікоў дзяржпрадпрыемстваў, з выканкамаў, памежных службаў і вайскоўцаў. Зазывалі на мітынгі і згодаю, і сілай: прапаноўвалі адгулы, дадатковыя выходныя, прэміі ды пагражалі звольніць. Нягледзячы на ўсё, людзі масава адмаўляліся.
- У адкрытых крыніцах інфармацыі пра месца і гадзіну збору не было ажно да ўчора, калі ў сеціве з’явіўся плакат з заклікам да тых, хто «жадае дабра і міру Беларусі», збірацца ля менскай стэлы.
- Раней «прыхільнікаў» Аляксандра Лукашэнкі звозілі ў Менск на мітынг 16 жніўня на плошчы Незалежнасці і на жаночы форум у «Менск-Арэне» 17 верасня.
- Святлана Ціханоўская запатрабавала ад Лукашэнкі сысці ў адстаўку, спыніць гвалт на вуліцах і вызваліць палітвязняў да 25 кастрычніка. Калі ўмовы «народнага ўльтыматуму» не будуць выкананыя, у краіне, паабяцала яна, пачнецца страйк на прадпрыемствах і блакаванне дарог.
Дар’я Курачкіна belsat.eu
