За ўдзел у акцыях пратэсту 17 кастрычніка ў Менску былі затрыманыя больш за 50 асобаў, паведамляе сайт праваабарончага цэнтру «Вясна».
Паводле праваабарончага цэнтру «Вясна» 17 кастрычніка ў Менску былі затрыманыя 51 чалавек.
Сярод затрыманых – заснавальнік ІТ-кампаніі Bamboo Group Уладзіслаў Герчыкаў. Яго выцягнулі з машыны ў двары на вуліцы Казлова ў цэнтры Менску падчас студэнцкай акцыі 17 кастрычніка. Зараз Герчыкаў знаходзіцца ў ЦІП на Акрэсціна.
Bamboo Group – прыватная група тэхналагічных кампаніяў. У беларускім офісе працуе каля 100 чалавек.
Таксама напярэдадні міліцыянты затрымалі фатографа БелаПАН і парталу Tut.by Вадзіма Заміроўскага, журналістку парталу Onliner Дар’ю Спявак і журналіста БелаПАН і TUT.BY Усевалада Зарубіна.
Першапачаткова міліцыянты пракаментавалі, што журналістаў затрымалі для праверкі дакументаў. Пазней стала вядома, што супраць іх распачалі адміністрацыйныя справы.
17 кастрычніка ў Менску адбыліся дзве акцыі – студэнцкі марш маладосці і ўжо традыцыйны для суботы жаночы марш.
AA belsat.eu
