Інфармацыю пра затрыманне ў Менску грамадзянкі Расеі Ганны Багачовай паводле запыту ЗША праваахоўнікі Беларусі пакуль афіцыйна не пацвярджаюць. Пра гэта паведамляе interfax.
«Камітэт не мае інфармацыі аб затрыманні гэтай грамадзянкі», – заявіў агенцтву interfax афіцыйны прадстаўнік Камітэту дзяржбяспекі Андрэй Яраш.
У іншых сілавых і праваахоўных органах краіны, а таксама ў пасольстве Расеі ў Беларусі інфармацыю пра затрыманне Багачовай не каментуюць.
У сваю чаргу расейскае інфармацыйнае агенцтва «Новости» са спасылкай на ананімную крыніцу паведамляе, што Ганна Багачова была затрыманая ў Менску ўвечары 13 кастрычніка. Жанчыну затрымалі паводле запыту ЗША, паколькі яна праходзіць па справе аб умяшальніцтве ў амерыканскія выбары.
Паведамляецца, што затрыманне адбылося ў адным з гатэляў Менску.
Багачова ўваходзіць у спіс з 13 грамадзянаў Расеі, якім высунулі абвінавачанні пасля расследавання спецпракурора ЗША Робэрта Мюлера. Паводле медыяў, Ганна Багачова звязаная з «фабрыкай троляў», структурай Яўгена Прыгожына.
СК belsat.eu