Расейскія ўлады не выступяць супраць удзелу асобных спартоўцаў у Алімпіядзе-2018 у Пхёнчхане, заявіў прэзідэнт Расеі Уладзімір Пуцін.
«Мы, без усялякага сумневу, не будзем аб’яўляць ніякай блакады, не будзем перашкаджаць нашым алімпійцам браць удзел, калі нехта з іх захоча прыняць удзел у асабістай якасці», – перадае «Інтэрфакс» словы Пуціна на сустрэчы з рабочымі Горкаўскага аўтамабільнага заводу.
«Трэба наўпрост сказаць, што мы часткова самі ў гэтым вінаватыя, таму што далі падставу для гэтага», – пракамэнтаваў Пуцін рашэнне Міжнароднага алімпійскага камітэту адхіліць зборную Расеі ад удзелу ў Гульнях. Пры гэтым, паводле слоў Пуціна, «гэтай падставай скарысталіся не зусім сумленным чынам».
Расейскі кіраўнік таксама паставіў пад сумнеў факты, якімі кіраваўся МАК у сваім рашэнні.
Нагадаем, 5 снежня Міжнародны алімпійскі камітэт па выніках пасяджэння ў Лазане вырашыў адхіліць расейскую зборную ад зімовых Алімпійскіх гульняў у паўднёвакарэйскім Пхёнчхане.
Расейскія спартоўцы, не замяшаныя ва ўжыванні допінгу, змогуць выступіць пад нейтральным сцягам.
КА, belsat.eu