1 снежня ў Беларусі быў не толькі першым днём зімы, але і 115-м днём паслявыбарных штодзённых пратэстаў.
У беларускіх уладаў праблемы з фінансамі. Толькі жыхары Менску вінныя за камуналку на 1 лістапада амаль 9 млн рублёў. Пратэрмінавалі плацяжы амаль 10% рахункаў, кажуць у «Цэнтр інфармацыйных тэхналогіяў Менгарвыканкаму».
Раней беларусаў заклікалі не плаціць у час за камуналку ў якасці адной з формаў эканамічнага пратэсту.
Напярэдадні ж стала вядома, што дзярждоўг Беларусі за 10 месяцаў вырас амаль на 30%.
Каб неяк кампенсаваць свае выдаткі, улады пачалі павышаць кошты. Гэтак, у Берасці даражэе праезд на грамадскім транспарце. На 10 капеек. Раней кошты аналагічна падаражэў транспарт на Гомельшчыне і Гарадзеншчыне.
Таксама з 1 снежня падаражэлі некаторыя цыгарэты.
Калядны міжнародны турнір на прыз Аляксандра Лукашэнкі ў 2021 годзе не адбудзецца. Пра гэта паведамілі ў Федэрацыі хакею Беларусі. Афіцыйная прычына скасавання турніру – пандэмія каронавіруса, які, як даведаліся беларусы са злітай размовы галасоў, падобных да Наталлі Эйсмант і Мікалая Латышонка, лютуе нават у адміністрацыі Лукашэнкі.
Хакейны турнір штогод праходзіў у Менску з 2005 года. Каманда Лукашэнкі выйгравала яго 13 разоў.
Між тым Беларускі фонд спартыўнай салідарнасці патрабуе ад Міжнароднай федэрацыі хакея прыцягнуць да дысцыплінарнай адказнасці старшыню ФХБ Дзмітрыя Баскава ў сувязі з дзеяннямі, якія груба ганяць рэпутацыю хакея як віду спорту.
Сярод такіх дзеянняў, паводле БФСС, прамое дачыненне Баскава да забойства Рамана Бандарэнкі, удзел у агітацыйных акцыях у падтрымку Лукашэнкі з выкарыстаннем Алімпійскай сімволікі, дэманстратыўнае піццё моцнага алкаголю на фоне Алімпійскай сімволікі і ціск на спартсменаў і супрацоўнікаў, якія выказваюць сваю грамадзянскую пазіцыю.
БФСС будзе дамагацца поўнай забароны Дзмітрыю Баскаву на прадстаўленне алімпійскага руху Беларусі і пажыццёвай забароны на ўдзел у любых хакейных мерапрыемствах.
Святлана Ціханоўская абвясціла аб запуску платформы «Адзіная кніга рэгістрацыі злачынстваў». Там будуць збірацца сведчанні затрыманняў, катаванняў і збівання, а таксама імёны тых, хто іх здзяйсняў. Рэалізацыяй праекту займалася Народнае антыкрызіснае кіраванне, якое ўзначальвае Павел Латушка, і ініцыятыва BYPOL.
Перш за ўсё, адзначыла Ціханоўская, кніга створана для сілавікоў, «якія апынуліся ўцягнутыя ў рэпрэсіўную машыну», але не хочуць у ёй удзельнічаць і могуць заявіць пра чыстасардэчнае прызнанні.
Беларускія хрысціяне розных канфесіяў падпісалі зварот да ўладаў з патрабаваннямі правесці новыя прэзідэнцкія выбары і спыніць гвалт на вуліцах краіны. Ліст падпісалі больш за 5000 чалавек, сярод іх – каля 100 святароў і пастараў розных хрысціянскіх канфесіяў.
А ўвечары беларусы зноў выйшлі на традыцыйныя дваравыя і не вельмі пратэсты.
МГ belsat.eu