Чалец Каардынацыйнай рады Павел Латушка выехаў з Беларусі ў Польшчу, гэтую інфармацыю ён пацвердзіў belsat.eu. Гаворка пра эміграцыю не ідзе.
Напярэдадні Аляксандр Лукашэнка заявіў, што Латушка перайшоў «чырвоную лінію».
У размове з «Белсатам» Павел Латушка пацвердзіў, што ў зараз ён знаходзіцца ў Польшчы па запрашэнні старшыні праграмнай рады Эканамічнага форуму, які праходзіць у Крыніцы Гурскай, Зыгмунта Бердыхоўскага.
Раней Латушка браў у ім удзел у якасці амбасадара Беларусі ў Польшчы і як чалец беларускай дэлегацыі.
«Падчас форуму перадам інфармацыю аб развіцці сітуацыі ў Беларусі, унутрыпалітычныя і ўнутры эканамічныя праблемы, правесці двухбаковыя сустрэчы. Таксама ў мяне запланаваныя сустрэчы з ва ўрадзе Польшчы, МЗС, Сейме і з прадстаўнікамі беларускай дыяспары», — распавёў ён у каментары нашаму тэлеканалу.
Далей Павел Латушка паедзе ў Вільню. У сталіцы Літвы ён сустрэнецца з кіраўніком МЗС, парламенту Літвы і дэпутатамі Еўрапарламенту.
Як дадатковае пытанне – абмеркаванне будучыні Купалаўскага тэатру.
«У аніякім багажніку мяжу я не перасякаў. Праходзіў яе праз памежны пункт Баброўнікі – Бераставіца. Усё было абсалютна нармальна і без перашкодаў», — запэўніў спадар Павел.
25 жніўня Павел Латушка быў выкліканы на допыт у Следчы камітэт. Яму было заяўлена, што ён знаходзіцца ў статусе сведкі паводле крымінальнай справы аб захопе ўлады Каардынацыйнай радай.
У інтэрвʼю «Белсату» на мінулым тыдні Павел Латушка падрабязна распавёў пра несхаванае вонкавае назіранне, а таксама заявіў, што мае намер працягваць працу ў Каардынацыйнай радзе.