Увесь дзень 16 красавіка па Магілёве гуляў моцны вецер. Па прагнозу хуткасць ветру вагалася ад 3 да 14 м/с, а парывы дасягалі 24 м/с. Адным словам, не лепшы час, каб гуляць на свежым паветры.
Увечары 16 красавіка жыхары Магілёву сталі дзяліцца наступствамі моцнага ветру ў сацыяльных сетках. Больш за ўсё не пашанцавала жыхарам мікрараёну Менжынка, там вецер паваліў бярозу на апору электраперадач, якая таксама не змагла ўстаяць. Кабелі абарваліся і дамы засталіся без электрычнасці. Пра гэта сведчаць фотаздымкі ў суполцы «Магілёў REAL».
У іншым раёне Магілёва, Юбілейным, моцны вецер паваліў дрэва. Моцныя пашкоджанні атрымаў прыпаркаваны аўтамабіль. Фотаздымкі з’явіліся ў суполцы «Магілёў LIVE».
Жыхары мікрараёну Восьмы Цагляны таксама дасылаюць у магілёўскія паблікі фотаздымкі пашкоджанага аўтамабіля. Дрэва зачапіла капот.
Акрамя дрэваў моцны вецер у Магілёве раскідаў будаўнічыя матэрыялы, якія ляжалі на даху 5-павярховага дому.
Але ёсць і шчаслівыя прыклады: паваленая ветрам дрэва ўпала як раз паміж аўтамабіляў, проста цудам не прычыніўшы шкоды.
Вольга Васільева Belsat.eu
