Урад Нямеччыны перакананы, што ключ да вырашэння праблемы прытоку нелегальных мігрантаў у Еўразвяз праз Беларусь ляжыць у Маскве. Пра гэта 20 кастрычніка на прэс-канферэнцыі ў Берліне заявіў міністр унутраных спраў Горст Зээгофэр.
«Праз тэрыторыю Беларусі адбываецца арганізаваная ці прынамсі падтрыманая на дзяржаўным узроўні дзейнасць у перавозцы нелегальных мігрантаў», – заявіў міністр, перадае DW.
Паводле яго, дзеянні Менску – гэта «гібрыдная пагроза», якую можна вырашыць «толькі супольна ў ЕЗ».
«Мы [ва ўрадзе Нямеччыны. – Рэд. Belsat.eu] усе перакананыя ў тым, што ключ да вырашэння праблемы ляжыць у Маскве», – сцвярджаў ён.
На яго думку, улады Беларусі «не могуць нічога гэтага рабіць без прынамсі ведання або адабрэння Масквы».
Зээгофэр таксама адзначыў, што з Іракам атрымалася дамовіцца аб тым, што адтуль наўпрост больш не будуць перавозіць людзей. Наперадзе перамовы і з іншымі дзяржавамі.
Нагадаем, што міністры замежных справаў дзяржаваў Еўразвязу абмеркавалі ў Люксембургу, якім будзе новы пакет санкцыяў для Лукашэнкі. Гаворка пра пакаранне за арганізаваную масавую нелегальную міграцыю ў Еўразвяз праз менскі аэрапорт.
«Плыні мігрантаў, якія накіроўвае ў Еўропу Лукашэнка, не аслабелі. Якія інструменты могуць выкарыстоўваць Літва, Латвія і Польшча, каб спыніць ваенізаваную міграцыю? Думаю, мы трохі зацягваем барацьбу з гэтым новым феноменам», – заявіў міністр замежных справаў Літвы Габрыелюс Ландсбергіс.
МГ belsat.eu