Створаная з ініцыятывы Уладзіміра Зяленскага група ўкраінскіх і міжнародных экспертаў, якія аналізуюць уплыў санкцыяў супраць РФ, апублікавала план узмацнення ціску на Расею і Беларусь.
Дакумент змяшчае рэкамендацыі для міжнароднай дэмакратычнай супольнасці адносна далейшых эканамічных захадаў, скіраваных на прымус расейскага кіраўніцтва да больш хуткага спынення вайны ва Украіне, а таксама ўзняцця кошту вайны для Расеі.
Вось асноўныя пункты плану:
- прызнанне Расеі і Беларусі дзяржавамі – спонсарамі тэрарызму, а Узброеных сілаў РФ – тэрарыстычнай арганізацыяй;
- поўная забарона на расейскі экспарт энерганосьбітаў;
- пашырэнне санкцыяў супраць фінансавага сектару Расейскай Федэрацыі і Рэспублікі Беларусь;
- узмацненне транспартных і страхавых санкцыяў;
- пашырэнне і ўзмацненне гандлёвых эмбарга і персанальных санкцыяў.
«Гэты дакумент стане асновай для далейшай працы нашага ўраду на ўзмацненне санкцыйнага ціску на Расею. Мы будзем прапаноўваць нашым партнёрам гэты спіс за аснову для каардынацыі ўвядзення санкцыяў», – адзначыў кіраўнік Офісу прэзідэнта Андрэй Ермак.
Таксама ў плане адзначаецца важнасць увядзення другасных санкцыяў і моц супольных намаганняў краінаў дэмакратычнага свету ў санкцыйнай палітыцы.
АД belsat.eu
