Генеральная пракуратура пачала крымінальную справу па факце смерці Рамана Бандарэнкі.
Крымінальная справа пачатая паводле ч. 3 арт. 147 КК па факце наўмыснага нанясення цяжкага цялеснага пашкоджання, якое пацягнула праз неасцярожнасць смерць чалавека.
У Генеральнай пракуратуры падкрэслілі, што «датычнасці працаўнікоў органаў унутраных справаў да нанясення Бандарэнку Р. І. цялесных пашкоджанняў не выявілі».
Раней акалічнасці справы забойства Рамана Бандарэнкі, які памёр 12 лістапада 2020 года пасля збіцця і выкрадання з плошчы Пераменаў, апублікавала ініцыятыва беларускіх сілавікоў «ByPol».
Паводле іх, да збіцця і выкрадання маглі быць датычныя працаўнікі сілавых ведамстваў, старшыня Федэрацыі хакею Дзмітрый Баскаў, ягоны сябар Дзмітрый Шакута, прэс-сакратар Аляксандра Лукашэнкі Наталля Эйсмант ды іншыя.
МГ belsat.eu
