Здымкі ваеннага лагеру пад Рэчыцай, зробленыя са спадарожніка, апублікаваў у сваім Твітары аналітык адкрытых дадзеных Coupsure.
Coupsure сцвярджае, што гэта лагер расейскіх вайскоўцаў.
На здымках можна заўважыць намётавы гарадок, тэхніку, артылерыю, інжынернае абсталяванне.
5 лютага ў Рэчыцкім раёне ў рамках сумесных беларуска-расейскіх вучэнняў прайшло мерапрыемства «Дзве дзяржавы – адзін народ, адна гісторыя», зазначае Zerkalo.io. У рамках мерапрыемства адбыліся паказальныя выступы сілаў спецыяльных аперацыяў РФ, а таксама выстава ваеннай тэхнікі.
У лютым на паўднёвых і заходніх межах Беларусі маюць адбыцца пазапланавыя расейска-беларускія вайсковыя вучэнні «Саюзная рашучасць – 2022».
Вучэнні «Саюзная рашучасць» – частка маштабнага правярання сілаў рэагавання Саюзнай дзяржавы на тэрыторыі Беларусі. Першы этап праверкі мусіць завяршыцца да 9 лютага, ён улучае перадыслакацыю і стварэнне груповак войскаў, ахову паветранай прасторы ды ацэнку гатовасці войскаў СПА. Другі этап, які пройдзе з 10 да 20 лютага, складаецца з уласна вучэнняў «Саюзная рашучасць». Намеснік міністра абароны РФ, генерал-палкоўнік Аляксандр Фамін заявіў, што плануюць рыхтаваць войскі да дзеянняў «не толькі ў сваіх межах адказнасці, але і да развязання задачаў для лакалізацыі крызісных сітуацыяў на любых пагражальных кірункаў».
Напярэдадні вучэнняў у Беларусь перакінулі шмат расейскай ваеннай тэхнікі і вайскоўцаў.
ГГ, belsat.eu