Нацыянальны банк Беларусі чакае набліжэння інфляцыі да мэтавага ўзроўню 5 % у другой палове 2019 года, хоць у другім квартале яна будзе вышэйшая за мэтавы арыенцір. Пра гэта 3 траўня паведаміў на брыфінгу старшыня праўлення Нацбанку Павел Калаур.
У другім паўгоддзі ўплыў часовых фактараў мусіць стаць прыкметна слабейшым, у выніку чаго інфляцыя запаволіцца і наблізіцца да мэтавага ўзроўню да канца года, паведамляе БелТА.
Нацбанк чакае, што спажывецкая актыўнасць і раздробны таваразварот будуць расці ўмерана, бо мусіць нармалізавацца інтэнсіўнасць спажывецкага крэдытавання і рост заробкаў будзе адпавядаць павышэнню прадукцыйнасці працы. Тым не менш, Павел Калаур прызнаў, што ёсць і рызыкі, якія могуць паскорыць інфляцыю.
Апроч таго, старшыня Нацбанку заявіў, што зараз няма і фундаментальных фактараў, якія б падштурхоўвалі банкі павышаць працэнтныя стаўкі па крэдытах. У першым квартале яны трошкі павысіліся, але з улікам інфляцыі іх значэнні ў рэальным выражэнні амаль не змяніліся. Сённяшні ўзровень працэнтных ставак у цэлым адпавядае эканамічнай сітуацыі, адзначыў Павел Калаур.
МГ belsat.eu