На мітынг у Браславе сабраліся больш за семсот чалавек. Улады вылучылі пляцоўку, дзе звычайна праходзяць фэсты «Браслаўскія зарніцы». Праўда, не паднялі даху над сцэнаю, таму выступоўцы гавораць побач з ёй.
На пачатку вядоўца павіншаваў дэсантнікаў са святам. Мітынг распачала давераная асоба Святланы Ціханоўскай Алена Радзькова. Яна пытаецца ў каго зарплата 500 долараў. Рук амаль няма, чуваць толькі абуральныя воклічы. Далей сустрэча працягваецца ў фармаце вольнага мікрафона. Перыядычна гучыць песня ў выкананні Ціханоўскага «Стены рухнут».
Шмат хто прыйшоў з бел-чырвона-белымі сцягамі. Адзін з выступоўцаў, пенсіянер, кажа, што ў Браславе няма працы, таму тут так шмат міліцыі. Маўляў, маладым хлопцам няма куды пайсці. Мітынг сустракае гэта дружным смехам.
На мітынгу выступілі таксама кандыдат у прэзідэнты 2010 года Віктар Цярэшчанка і аналітык Дзмітрый Івановіч. Ён звярнуў увагу на тое, што за 25 гадоў Браслаўскі раён зменшыўся на траціну, а Мёрскі раён – на 40 адсоткаў.
Вядоўцы заклікалі не ісці на датэрміновае галасаванне, рэгістравацца назіральнікамі і рэгістравацца ў сістэме «Голас». Вельмі шмат людзей захацела выказацца, усе атрымалі слова. Мітынг распачаўся ў 15 гадзін і скончыўся ў 17.00. Мітынг завяршыўся скандаваннем «Жыве Беларусь!» Усё прайшло ў спакойнай атмасферы.
ЗЛ belsat.eu
