У пятнічную раніцу 22 студзеня 35-гадовы Павел Банькоўскі падпаліў сябе на плошчы Незалежнасці ў Менску. За час паслявыбарчых пратэстаў гэта ўжо другі акт самападпалу.
Мужчына жывы, але ягоны стан даволі цяжкі.
«Павел – у рэанімацыі ў штучнай коме. У яго 72 % апёкаў цела, 4-я ступень апёкаў галавы. Прагнозы не суцяшальныя, але сэрца моцнае, можа быць, выжыве», – паведамляе ягоны знаёмы.
Першыя паведамленні пра інцыдэнт пачалі з’яўляцца каля 11:00 у тэлеграм-каналах. На відэа бачна, што чалавек падпаліў сябе побач з Домам ураду. Што было мэтаю такога дзеяння, пакуль невядома.
Мужчыну патушылі мінак і працаўнік праваахоўных органаў. Пацярпелага адразу даставілі ў Рэспубліканскі апёкавы цэнтр. Пасля на месцы самападпалу працавалі следчыя і міліцыянты.
АД, belsat.eu