Мінздраў пракаментаваў сітуацыю, калі вайсковая тэхніка не прапусціла «хуткую»


Ілюстратыўнае фота bymedia.net

Начальнік аддзелу арганізацыі экстранай абароны пры надзвычайных сітуацыях Мінздраву Алег Панчук пракаментаваў рэзанансную сітуацыю на менскім скрыжаванні.

29 чэрвеня ў сацсетках апублікавалі відэа, на якім бачна, як на скрыжаванні вуліцы Сурганава з праспектам Незалежнасці машына хуткай дапамогі з уключанымі пробліскавымі маячкамі не можа праехаць з-за вайсковай тэхнікі, якая едзе па праспекце.

«Бываюць сітуацыі, калі хуткая дапамога едзе з уключанымі пробліскавымі маячкамі, але гэта не дае ёй перавагі», – адзначыў Алег Панчук.

Ён таксама ўдакладніў, што няма інфармацыі аб памерлых або пацярпелых з-за гэтага інцыдэнту:

«Калі б гэта адбылося, то пра гэта б ведалі ў нашым цэнтры экстранай дапамогі».

Алег Панчук называе гэты выпадак «жыццёвым».

Рашэнне аб тым, які маршрут для руху выбіраць і як ехаць, прымае брыгада хуткай дапамогі, якая абслугоўвае выклік пацыента. Аднак Панчук адзначыў, што ў Міністэрства аховы здароўя былі спробы пашырыць правы медыкаў у гэтай частцы:

«Мы выходзілі на МУС, але заканадаўча не змаглі прасунуцца, таму што ў гэтым выпадку ідуць парушэнні ўжо больш глабальныя. Калі на выклік выязджае міліцыя, то ў іх ёсць перавага – яны выязджаюць на злачынства. А у медыкаў ёсць магчымасці змены алгарытму, напрыклад, мы можам разгарнуцца (у неналежным месцы – заўв.). Але, на жаль, хуткая не можа змяніць месца прыёму выкліку і выклік не адмяняе праезд калоны – хуткая можа ісці туды, дзе праходзіць тэхніка. У гэтым выпадку, хутчэй за ўсё, выклік тэрытарыяльна ішоў з таго месца, дзе ехала калона, таму наш аўтамабіль там і апынуўся, а не таму, што кіроўца ведаў і не выканаў».

Намеснік начальніка галоўнага ўпраўлення – начальнік упраўлення аховы правапарадку і прафілактыкі міліцыі грамадскай бяспекі МУС Дзмітрый Кур’ян адзначыў, што перад правядзеннем трэніровак і параду інфармацыя пра час перакрыццця вуліц публікавалася ў медыях і кіроўцы, улічваючы гэтую інфармацыю, маглі загадзя запланаваць маршрут руху.

НМ, belsat.eu, паводле Tut.by

Глядзі таксама
Каментары