Міністэрства аховы здароўя распаўсюдзіла паведамленне пра стан здароўя спевака Дзмітрыя Калдуна. Паводле ведамства, тэсты на каронавірус паказалі адмоўны рэзультат.
Мінздароўя паведамляе, што сапраўды Дзмітрыя Калдуна шпіталізавалі ў 6-ю больніцу Менску. Напярэдадні выканаўца пачуў сябе блага, у яго паднялася тэмпература. Артыст вырашыў здаць тэст на каронавірус.
«У прыёмным пакоі яму зрабілі экспрэс-тэст, які паказаў сумнеўны вынік на наяўнасць імунаглабулінаў М, у сувязі з чым было вырашана правесці далейшую ПЦР-дыягностыку. На сённяшні дзень – дыягназ пнеўманія выключаны, таксама атрыманыя адмоўныя вынікі ПЦР-дыягностыкі COVID-19 і адмоўны вынік колькаснага тэсту на наяўнасць антыцелаў. Стан Дзмітрыя стабільны», – гаворыцца ў паведамленні Мінздароўя.
Мінздароўя паведамляе, што канчатковы дыягназ будзе выстаўлены па выніках лабараторных даследаванняў на наяўнасць узбуджальнікаў рэспіратарных захворванняў.
Напярэдадні выканаўца ў сваім Instagram напісаў, што ў яго і ягонай жонкі выявілі каронавірус.
«У Менску няма каранціну, таму я мог дзе заўгодна падчапіць гэты вірус. Пры гэтым я намагаюся пазбягаць месцаў з вялікаю колькасцю людзей і прытрымліваюся захадаў бяспекі. Учора адчуў лёгкі кашаль і невялікую тэмпературу, вырашыў, што само пройдзе, выпіў простыя гарачкапаніжальныя і таблеткі ад кашлю. Аднак не дапамагло. Тады я вырашыў зранку паехаць з жонкаю і здаць тэст. І тут у нас абодвух дыягнаставалі COVID-19», – распавёў спявак.
Раней кіраўнік краіны Аляксандр Лукашэнка агучыў, што Беларусь перамагла каронавірус.
«Мы гэта з вамі пераадолелі. І дай бог, каб далей паціху. Нам трэба паволі адысці ад гэтай бяды і не дапусціць паўторнай эпідэміі. Гэта для нас вельмі важна», – рэзюмаваў ён.
СК belsat.eu
