Паводле чыноўнікаў, змест відэа выклікае шмат пытанняў.
«Пры гэтым не ясна ані паходжанне роліка, ані тое, ці мела такая сітуацыя месца ў рэчаіснасці, ці гэта чарговая фэйкавая пастаноўка».
Таму міністэрства адукацыі не збіраецца праводзіць расследаванне інцыдэнту і даваць каментары.
Таксама ў Міністэрстве падкрэслілі, што прымусовае ўступленне ў БРСМ недапушчальна.
«Ніякіх разнарадак на гэты конт у школах няма і быць не можа. БРСМ – добраахвотнае грамадскае аб’яднанне», – паведамляе старонка ведамства.
Відэазапіс, зняты вучнямі менскай гімназіі, трапіў у рэдакцыю «Свабоды». На відэа настаўніца прымушае ўступаць у БРСМ, бо «адміністрацыі школы патрэбная стоадсоткавая статыстыка, інакш можа быць адлічэнне з класу». Пры гэтым ніводны вучань уступіць у моладзевую арганізацыю не хацеў.
«Зрабілі, забылі, заткнуліся і сядзіце ціхенька – ніхто вас чапаць не будзе», – не спынялася ціснуць настаўніца.
У сацыяльных сетках з’явілася інфармацыя, што запіс зроблены ў менскай гімназіі № 31. Дырэктарка Алена Мазуркевіч не адказвае на тэлефанаванні. Цяпер у навучальных установах вакацыі.
ДР belsat.eu