«Міліцыя стане на бок народу, калі будзе 100 тысяч і больш». Ціханоўскі заклікаў да пратэсту
Сяргей Ціханоўскі, якога 20 траўня выпусцілі пасля двух тыдняў у ізалятары, правёў стрым на сваім канале ў YouTube. Мы сабралі найважнейшыя цытаты з выступу блогера.
За адну гадзіну стрыму гледачы пералічылі яму данатаў на $ 2 000. Адначасова яго глядзелі 35 тысяч чалавек.
На пачатку ён падзякаваў усім, хто яго падтрымлівае і паабяцаў дапамогу тым, каго арыштавалі або аштрафавалі за акцыі салідарнасці.
На пытанне гледачоў, ці спрабавалі яго завербаваць, Ціханоўскі адказаў:
«Не, ніхто ніколі са мной не гутарыў, ні МУС, ні КДБ ніякіх прафілактычных размоваў не праводзілі»
«У палкоўніка дрыжалі калені»
«Я глядзеў у вочы магілёўскаму АМАПу, гомельскаму АМАПу і з міліцыянтамі, з палкоўнікам Пугачовым у Магілёве, які мяне ў ІЧУ афармляў. З палкоўнікамі і падпалкоўнікамі ў Гомлі. І ў іх ва ўсіх дрыжаў голас, у Пугачова нават калені дрыжалі. Яны рэальна адчуваюць разгубленасць, разумеюць, што робяць нешта кепскае, але з іншага боку, выконваць загад – іхная праца.
Я зразумеў (і са словаў некаторых супрацоўнікаў), што, сябры, калі пратэст будзе масавым, міліцыя, і калі дыктатар выведзе войска – і войска стане на бок народу. Сто адсоткаў стане! Але гэта не дзве тысячы павінна быць, не дваццаць, сорак, сто і вышэй – у Менску і па абласных гарадах».
«Калі хтосьці мае яшчэ нейкія ілюзіі – усё, рабяты, адкіньце. Тое, што я бачу – гэта пратэст, усебеларуская забастоўка. 9 жніўня яна пачнецца, 10-га яна працягнецца, і калі ён прыменіць сілу… Нічога не бойцеся. Міліцыянты не будуць перавышаць свае службовыя абавязкі – нават мяне не білі. У іх голас дрыжаў. У маёра, які на мяне пратакол складаў, асадка ў руках трэслася»
«Мне выклікалі хуткую ў ізалятар»
Паводле блогера, адвакатаў адмыслова не пускалі ў ізалятар, каб ён мог падпісаць дакументы, неабходныя для рэгістрацыі ініцытыўнай групы.
«6 траўня я выехаў у бок Менску, мы планавалі там рэпетыцыю антыпараду і запіс некалькіх інтэрв’ю і ўсё-ткі мяне затрымалі.
Я думаў, гэта [было зроблена], каб нейкія мерапрыемствы нашыя перадухіліць, а насамрэч аказалася, што ўлада насамрэч такая агідная, подлая і дробязная. Затрымалі, каб я не мог падаць дакументы ў ЦВК»
З Магілёва ў гомельскі ІЧУ Ціханоўскага везлі ў мікрааўтобусе ў кайданках, а потым не дазволілі хуткай дапамозе забраць яго ў шпіталь, кажа ён.
«Падчас затрымання я аступіўся з іх дапамогай (я лічу, там ДАІшнік вінаваты) і ў мяне надзьмулася нага. Наіўныя міліцыянты выклікалі хуткую ў ІЧУ, за што, напэўна, атрымалі дысцыплінарнае пакаранне.
Прыехала хуткая дапамога, паглядзела нагу маю распухлую, зрабілі абязбольваючы ўкол і сказалі: «Мы яго забіраем у траўматалогію, трэба рабіць здымак, там пералом або расколіна». Праз пяць хвілін гэтую хуткую міліцыянты адправілі назад. Мне ніякай медычнай дапамогі не аказалі, хуткай мяне не аддалі»
«Мяне проста выкінулі ў горад»
Пра сваё вызваленне 20 траўня Ціханоўскі даведаўся раптоўна:
«Я запытаў, чаму выкідаеце на вуліцу. Міліцыянт кажа, ну, у вас скончыўся час перабывання ў нас і мы вас больш трымаць не можам. Улада незаконна зачыняе, незаконна хапае, незаконна асуджае, незаконна выпускае. Чыняць што хочуць!» – абурыўся блогер.
На пытанне гледачоў стрыму, ці далучыцца ён да закліку Міколы Статкевіча выйсці на легальны мітынг аднаго з «кандыдатаў пратэсту» 24 траўня ў Менску, ён адказаў:
«Калі Статкевіч кліча 24-га на пратэст, трэба ісці. Магчыма, і я буду»
***
- Нагадаем, Сяргея Ціханоўскага затрымалі 6 траўня і накіравалі адбываць 15 содняў адміністратыўнага арышту за акцыю супраць інтэграцыі з Расеяй 20 снежня (снежаньскія пратэсты ён асвятляў для свайго блогу).
- Падчас адбыцця адміністратыўнага пакарання над блогерам адбыліся яшчэ два суды, на кожным з якіх ён атрымаў яшчэ па 15 содняў арышту. Агулам ён мусіў правесці за кратамі 45 дзён. Ён казаў, што мае яшчэ 7 пратаколаў.
- 7 траўня ён абвясціў, што ідзе на прэзідэнцкія выбары, аднак ЦВК адмовіў у рэгістрацыі ягонай ініцыятыўнай групы.
- Жонку блогера Святлану Ціханоўскую з яе ініцыятыўнай групай 20 траўня ЦВК зарэгістраваў.
