Кіраўнік Беларусі пракаментаваў сваё рашэнне не ехаць у Польшчу на адзначэнне 80-й гадавіны пачатку Другой сусветнай вайны. Пра гэта паведамілі ў ягонай прэс-службе.
Аляксандр Лукашэнка адзначыў, што быў не супраць правесці памятныя мерапрыемствы з нагоды пачатку Другой сусветнай вайны. І прадстаўнікі Беларусі ў гэты час былі ў Польшчы.
«Так, Прэзідэнт туды не паехаў. Дык не я адзін не паехаў. І гэта не выпад супраць Захаду. Мы вельмі добра ставімся да польскага народу і будзем да іх так ставіцца», – сказаў кіраўнік Беларусі.
Адносна таго, што ў Польшчу не запрасілі кіраўніка Расеі Уладзіміра Пуціна, ён заявіў, што гэта справа палякаў. Паводле яго, і сам Пуцін «надта і не рваўся туды ехаць». Але Лукашэнка прызнаў, што яму не падабаецца гэта, бо «унёсак асноўны ў перамогу зрабілі менавіта рускія людзі».
Нагадаем, што кіраўнік Беларусі Аляксандр Лукашэнка адмовіўся ад запрашэння прэзідэнта Польшчы Анджэя Дуды наведаць падзеі да 80-годдзя пачатку Другой сусветнай вайны. Замест яго беларускі бок на падзеях у Варшаве прадстаўляў амбасадар Уладзімір Чушаў. У Расеі віталі такое рашэнне афіцыйнага Менску.
Лукашэнка пра Болтана: Прыехаў і прыехаў
Пракаментаваў кіраўнік Беларусі і розныя здагадкі адносна прыезду ў Беларусь 29 жніўня дарадцы прэзідэнта ЗША ў нацыянальнай бяспецы Джона Болтана. Лукашэнка нагадаў, што перад гэтым Болтан наведаў Расею.
«Мы ж спакойна гэта пераносілі. Мы не ўзнікалі. Прыехаў і прыехаў», – сказаў ён.
Кіраўнік Беларусі адзначыў, што хоча наладзіць стасункі з ЗША, як гэта робіць і Расея.
«Мяне ж кіраўніцтва Расеі ў гэтым не папракае. Гэта канспіралогія вакол так званых палітолагаў, сацыёлагаў, журналістаў асобных прыкормленых. Вось яны і пачынаюць там «бамбіць» з усіх бакоў. Ясна, хтосьці замаўляе. Я ведаю, хто«, – сказаў Лукашэнка.
Ён падкрэсліў, што нягледзячы на крытыку, Беларусь застанецца з Расеяй, «нягледзячы нават на тую палітыку па вуглевадародах, тармажэнні нашых прадуктаў харчавання».
Нагадаем, што кіраўнік Беларусі Аляксандр Лукашэнка адмовіўся ад запрашэння прэзідэнта Польшчы Анджэя Дуды наведаць падзеі да 80-годдзя пачатку Другой сусветнай вайны. Замест яго беларускі бок на падзеях у Варшаве прадстаўляў амбасадар Уладзімір Чушаў. У Расеі віталі такое рашэнне афіцыйнага Менску.
МГ belsat.eu
