Аляксандр Лукашэнка прызнаў, што ў беларуска-расейскіх стасунках ёсць нявырашаныя пытанні, але ўсе спрэчкі з Масквой ён плануе развязаць да 2019 года.
Пра гэта Лукашэнка заявіў на прэс-канферэнцыі для расейскіх журналістаў у Менску.
«Пытанні пакуль, на жаль, застаюцца. І бліжэйшым часам мы разам з маім расейскім калегам пастараемся іх развязаць», – сказаў Лукашэнка.
Раней, 7 снежня, прэс-сакратар прэзідэнта РФ Дзмітрый Пяскоў заяўляў, што Пуцін і Лукашэнка дамовіліся правесці двухбаковую сустрэчу да новага года.
Лукашэнка падкрэсліў, што журналістам не трэба перабольшваць спрэчкі Беларусі і Расеі.
«Гэта працоўныя моманты. У стасунках паміж нашымі краінамі яшчэ не было сітуацыі, у якіх мы не знайшлі б кампрамісу», – дадаў ён.
Лукашэнка адзначыў, што Расея застаецца стратэгічным партнёрам і саюзнікам Беларусі. Ён заявіў, што беларускі бок гатовы і далей развіваць інтэграцыю з Расеяй, але пры ўмовах «жалезабетоннага выканання дасягнутых дамоўленасцяў».
«Інтэграцыйныя пазіцыі Беларусі нязменныя», – падкрэсліў ён.
