Штаб Святланы Ціханоўскай падаў першую заяву на расследаванне злачынстваў сілавікоў у рамках універсальнай юрысдыкцыі.
Заяву для распачынання крымінальнай справы падалі паводле факту гвалту над прадпрымальнікам Максімам Харошыным, паведамляе штаб Ціханоўскай. У межах справы сабраныя вынікі медэкспертызы, якая выявіла цялесныя пашкоджанні, фота і відэа яго затрымання, на якіх паказаныя твары падазраваных сілавікоў.
Адвакат Гедрус Данелюс, які падаў заяву ў генпракуратуру Літвы, тлумачыць, што літоўскі закон дазваляе праводзіць дасудовае расследаванне і сам суд, калі злачынства было здзейснена не ў Літве і падазраваны не знаходзіцца ў краіне. Абавязкова прысутнасць заяўніка, то бок ахвяры. І калі ў справе ёсць наўпроставыя доказы, суд паводле ўніверсальнай юрысдыкцыі мае права вынесці прысуд.
Штаб Святланы Ціханоўскай распрацоўвае падачу і іншых такіх заяў у розных краінах, куды выехалі беларусы, што прайшлі праз катаванні з боку сілавікоў. У Вільні будзе знаходзіцца каардынацыйны цэнтр праекту.
Дарадца Ціханоўскай Аляксандр Дабравольскі заявіў, што канчатковая мэта – крымінальны пераслед у Беларусі, а прамежкавая – аб’яўленне злачынцаў у міжнародны вышук.
«Мы запусцілі гэты праект у рамках Народнага Трыбуналу. Кожны, хто здзяйсняе злачынствы і бʼе дубінкамі людзей, павінен панесці адказнасць і не здзіўляцца, калі яго імя зʼявіцца ў спісах Інтэрпола», – заявіў ён.
Уладальнік кветкавай крамы «Первый Цветной» Максім Харошын быў затрыманы ранкам 13 кастрычніка ў адным са сталічных двароў. Мужчына вядомы тым, што на жаночых маршах раздаваў кветкі дзяўчатам.
Да аўтамабіля Максіма падʼехалі два аўта з невядомымі ў балаклавах. Мужчыну «дасталі» з машыны, і з заламанымі за спінаю рукамі «суправадзілі» ў мікрааўтобус. Затрыманага даставілі ў РАУС Першамайскага раёну, адкуль яго забралі ў больніцу. У Максіма былі дыягнаставаныя чэрапна-мазгавая траўма і шматлікія пабоі.
Праз некаторы час Максім Харошын з’ехаў у Літву.
МГ belsat.eu