Актывіста «Маладога фронту» абвінавацілі ў хуліганстве і апаганьванні збудаванняў.
Сёння вынеслі прысуд актывісту «Маладога фронту» Піліпу Шаўрову. Згодна з інфармацыяй belsat.eu, ён атрымаў 1350 рублёў штрафу паводле арт. 339 ч.1 Крымінальнага кодэксу («хуліганства») і арт. 341 («апаганьванне збудаванняў»). Маёмасць Шаўрова застаецца арыштаванай да моманту выканання прысуду. Суддзя Ігар Касцян задаволіў патрабаванне пракурора, якая прасіла даць актывісту штраф у 50 базавых велічынь.
Нагадаем, што Піліп Шаўроў 16-19 студзеня 2020 года пафарбаваў рукі помніку Пушкіна, намаляваў бел-чырвона-белы сцяг на помніку МУС і зрабіў графіці «1937» на сценцы помпавай станцыі ў Бараўлянах. Ён правёў у СІЗА амаль чатыры месяцы. Суд над ім пачаўся толькі ўчора, 18 траўня.
Сёння падчас судовых спрэчак пракурор Маргарыта Курыловіч зазначала, што палітычныя матывы правапарушэння не лічацца апраўданнем, і прасіла адзначыць, што ўсе сведкі і грамадзяне, якія паведамілі аб псаванні помніку, былі абураныя гэтым учынкам і палічылі яго актам вандалізму і непавагі да гісторыі і культуры.
Курыловіч звярнула ўвагу на тое, што Шаўроў меў дакладны намер пафарбаваць рукі помніку Пушкіну. Ён не аднойчы прыцягваўся да адміністрацыйнай адказнасці і не мае пастаяннага месца працы.
Адвакат актывіста Яўген Маслоў на судзе зазначыў, што фарбаванне не з’яўляецца псаваннем маёмасці. Абаронца падкрэсліў, што Піліп Шаўроў зрабіў злачынства не з хуліганскіх мэтаў і не хацеў зняважыць грамадзянаў Беларусі.
Адвакат звярнуў увагу, што Шаўроў пагасіў шкоду, прызнаўся ў правапарушэнні і прыйшоў з пакаяннем. Таму абарона прасіла вынесці апраўдальны прысуд ці перакваліфікаваць справу ў адміністрацыйную.
У апошнім слове Піліп яшчэ раз раскаяўся ў сваіх дзеяннях.
«Высокі суд, я прашу прабачэння ва ўсіх, каго мае дзеянні зняважылі. Запэўніваю, што пасля агалашэння прысуду і ўладкуюся на працу і не буду займацца чымсьці падобным».
Магчыма, Піліп будзе надалей абскарджваць прысуд.
***
Месяц таму шэраг беларускіх праваабарончых арганізацыяў прызналі справу Піліпа Шаўрова палітычна матываванай і патрабавалі ягонага неадкладнага вызвалення.
Першапачаткова Піліпу пагражала да 6 гадоў зняволення. Агульная шкода ад зробленых ім графіці не перавышала Br 230.
Піліпа вызвалілі з СІЗА 4 траўня, яшчэ да суда.
КТ Belsat.eu