6 снежня на пасяджэнні першай сесіі Савету Рэспублікі Нацыянальнага сходу сёмага склікання старшынёй абралі Наталлю Качанаву. Пра гэта паведамляюць на сайце верхняй палаты парламенту.
У сваім выступе чыноўніца заклікала «захаваць пераемнасць, максімальна выкарыстаць патэнцыял, напрацаваны шостым скліканнем».
Важнымі напрамкамі заканатворчай дзейнасці яна назвала павышэнне эфектыўнасці эканомікі, стварэнне новых працоўных месцаў, развіццё дзелавой ініцыятывы, дыверсіфікацыя экспарту, умацаванне навукова-тэхнічнага патэнцыялу, інвестыцыі, цыфравізацыі. Таксама, паводле Качанавай, заканатворчая дзейнасць павінна быць накіравана «на зацвярджэнне спрадвечных, нацыянальных каштоўнасцяў беларусаў».
«Магчыма, нам трэба будзе прыняць удзел у глабальным праекце па ўдасканаленні Канстытуцыі. Адказнасць за гэтыя папраўкі і іншыя законы будзе насіць персанальны характар. Мы павінны быць гатовыя да гэтага і выпрацаваць найбольш прымальныя варыянты змяненняў з улікам нацыянальных інтарэсаў і сучасных тэндэнцый», – заявіла старшыня Савету Рэспублікі.
У міжнароднай палітыцы яна заклікала ўмацаваць «блізкія сувязі з былымі рэспублікамі Савецкага Саюзу», а таксама «выбудаваць эфектыўнае ўзаемадзеянне і супрацу з дзяржавамі Еўразвязу і далёкай дугі.
Наталля Качанава ў 2016-2019 гадах узначальвала Адміністрацыю кіраўніка дзяржавы. Цяпер замест яе гэту пасаду будзе займаць былы першы намеснік старшыні КДБ Ігар Сергяенка. Міхаіл Мясніковіч, які з 2015 года ўзначальваў Савет Рэспублікі, цяпер накіраваны на працу ў Еўразійскую эканамічную камісію.
МГ belsat.eu