Адзін з прэтэндэнтаў на дэпутацтва ў Дзяржынскай акрузе – беларускамоўны актывіст БРСМ Кірыл Шык. Ягоныя супернікі – кіраўнік «Гавары праўду» Андрэй Дзмітрыеў і старшыня Дзяржынскага райсавету дэпутатаў Аляксандр Саракач.
Кірылу Шыку 32 гады. Ён з’яўляецца першым сакратаром Менскага абласнога камітэту БРСМ, пражывае ў вёсцы ў Дзяржынскім раёне.
Раней ён быў адным з выпускнікоў курсаў «Ды-джэяў Адраджэння», якія ладзіць сустаршыня апазіцыйнай Беларускай хрысціянскай дэмакратыі Павел Севярынец. Уваходзіць у склад Таварыства беларускай мовы. У свой час, працуючы дырэктарам Чаркаскага дому культуры, ладзіў беларускамоўныя дыскатэкі.
У інтэрв’ю «Нашай Ніве» Кірыл Шык заявіў, што хоць і хадзіў на курсы Севярынца, палітычным аўтарытэтам для яго ўсё адно ёсць дзейны кіраўнік краіны Аляксандр Лукашэнка.
Актывіст называе сябе патрыётам Беларусі, для якога не існуе ні левых, ні правых поглядаў, а «погляд толькі адзін – гэта Беларусь».
МГ belsat.eu