Сапёры, МУС, КДБ, Следчы камітэт і МНС прыехалі ў гомельскую школу № 55, каб даведацца, хто хацеў яе замінаваць. Пакуль што высветліць асобы «тэрарыстаў» не ўдалося.
На электронную пошту школы прыйшоў ліст з пагрозай мінавання. Невядомыя пісалі, што набылі выбухоўку ў даркнэце, і каб пазбегнуць трагедыі, усе 9-класнікі мусяць атрымаць добрыя адзнакі па матэматыцы.
Ліст заканчваўся словамі: «Пабачымся ў Вальгале» (гэта рай для ваяроў у скандынаўскай міфалогіі).
Да позняга вечара вучняў дапытвалі ў актавай зале іншай школы, паведамляе gomel.today.
Belsat.eu у прыёмнай школы сказалі, што ўстанова працуе ў штатным рэжыме.
«У міліцыю нікога не забіралі. Вінаватых не знайшлі, нікога не пакаралі. Проста дзеці няўдала пажартавалі. Усё ў парадку», – адказалі нам.
Цяпер адбываецца правяранне.
ДР belsat.eu