Еўрапейскі інвестыцыйны банк, які ёсць фінансава-крэдытнай установай Еўразвязу, гатовы падтрымаць Беларусь падчас структурных рэформаў. Пра гэта 24 ліпеня на прэс-канферэнцыі ў Менску паведаміў віцэ-прэзідэнт банку Вазіл Гудак.
Таксама ЕІБ гатовы падзяліцца экспертным досведам Еўразвязу ў пытанні рэформаў і павышэння прадукцыйнасці працы. Тым не менш, заявіў прадстаўнік ЕІБ, структурныя рэформы з’яўляюцца суверэнным правам Беларусі, паведамляе БелаПАН.
Паводле Гудака, падчас яго сустрэчы са старшынём Нацбанку Беларусі Паўлам Калаурам той адзначыў, што эканамічны рост у краіне дасягнуў патэнцыялу, і каб развівацца хутчэй, чым на 2,5-2,8 % за год, неабходна пайсці на структурныя змены або рэформы.
Вазіл Гудак падкрэсліў, што многія структурныя змены ў Еўропе былі «дастаткова балючымі».
«Нікому не падабаецца, калі растуць цэны на энергарэсурсы, на ацяпленне і транспартныя паслугі», – сказаў віцэ-прэзідэнт ЕІБ, які раней сам быў міністр эканомікі Славаччыны
Нягледзячы на гэта, на яго думку, на структурныя рэформы ісці проста неабходна.
МГ belsat.eu