5 студзеня ў берасцейскай больніцы хуткай дапамогі адбыўся непрыемны інцыдэнт: 55-гадовы Мікалай Вакуліч, які быў нападпітку, ударыў у твар і некалькі разоў абразіў доктара хуткай дапамогі. У інтэрнэт гэты выпадак трапіў толькі 9 студзеня. На ўмовах ананімнасці мы паразмаўлялі з берасцейскім доктарам хуткай дапамогі, які распавёў, як да інцыдэнту паставіліся ў медычнай супольнасці.
– Тое, што адбылося ў берасцейскай больніцы хуткай дапамогі, ва ўсіх лекараў выклікала адмоўную рэакцыю. На жаль, гэта не першы напад нас. Падобныя выпадкі не ўсе афішуюць, і ў органы ўнутраных справаў не звяртаюцца, бо нашае кіраўніцтва прапаноўвае займацца такімі пытаннямі ў прыватным парадку і падаваць заяву асабіста ад сябе, а не ад арганізацыі. Ніхто не дае справам ход, бо сурʼёзных траўмаў супрацоўнікам хуткай дапамогі за апошнія некалькі гадоў нанесена не было, але раз на квартал падобная сітуацыя ўзнікае. Стабільна бывае, што пʼяны нападае, спрабуе стукнуць, для нас гэта, на жаль, стала нормай, – кажа наш суразмоўца.
Працаўнікам хуткай дапамогі ў падобных сітуацыя застаецца разлічваць толькі на сябе.
– Прызвычаіцца да гэтага немагчыма, але я шмат гадоў адпрацаваў, і з боку пʼянага я заўжды чакаю пагрозу. Заўсёды трэба быць гатовым да нападу. Бывае, трапляюць і псіхічна хворыя людзі, і ў алкагольным апʼяненні, яны ж не адэкватныя. Таму мы можам абараніць сябе толькі самі, я фізічна дужы чалавек, таму кожны напад я імкнуся спыняць, а вось што рабіць жанчынам, я не ведаю, – адзначае доктар.
Рэч у тым, што калі за абразу службовай асобы пры выкананні службовых паўнамоцтваў заводзіцца адміністратыўная справа, а за напад – крымінальная, то медыкаў хуткай дапамогі закон падобным чынам не абараняе.
– Кіраўніцтва нас не падтрымлівае ў гэтых пытаннях, паколькі ў нас такое заканадаўства. Калі працаўніка хуткай ударылі альбо абразілі, мы самі павінны падаваць заяву супраць гэтага чалавека, і разглядаецца гэта як прыватны пазоў. Я не памятаю, каб некага, хто зрабіў нешта падобнае супраць доктара хуткай, прыцягвалі да адказнасці за злоснае хуліганства, бо мы не лічымся дзяржаўнымі службоўцамі. Мы на працоўным месцы, але калі нападуць, да прыкладу, на супрацоўніка міліцыі, – адразу ж будзе крымінальная справа, а калі на нас – то не, – тлумачыць доктар хуткай дапамогі.
Наш суразмоўца не верыць, што напад, які адбыўся 5 студзеня, меў нейкі палітычны падтэкст.
– Я ўпэўнены, што ніякай палітычнай глебы ў той справе быць не магло. Проста пʼяны чалавек, мякка кажучы, павёў сябе цалкам не адэкватна і напаў на доктара.
Суразмоўца belsat.eu выключае, што падчас працы ад доктара хуткай дапамогі могуць гучаць нейкія палітычныя моманты.
– Сітуацыя пакуль не развязаная канчаткова, з нашага боку ўсё, што трэба, было зроблена. На сённяшні дзень міліцыя вядзе следства, а доктар застаецца на бальнічным. На жаль, падобныя выпадкі адбываюцца – гэта хуткая дапамога, вы ж ведаеце, з якім кантынгентам мы наагул маем справу: гэта і псіхічна хворыя, а колькі ў нас людзей нездаровых ходзяць, якія стаяць на ўліку. Ёсць у алкагольным апʼяненні, як той таварыш, які ўдарыў нашага доктара, яны ж усе сябе неадэкватна паводзяць, – сказала ў размове з «Белсатам» галоўная доктарка станцыі хуткай медычнай дапамогі Берасця Валянціна Пашкевіч.
Мужчына працаваў кіроўцам школьнага аўтобуса ў пасёлку Высцічы Берасцейскае вобласці. Цяпер на гэтае месца шукаюць новага кіроўцу праз абʼяву ў сацыяльных сетках.
Афіцыйна сітуацыю ў школе не каментавалі. Але супрацоўнікі кажуць, што прычынаю звальнення сапраўды быў інцыдэнт у шпіталі, пра гэта стала вядома 13 студзеня.
АС belsat.eu