«Была ўся сіняя». Гарадзенку збілі дзве амапаўкі, адну з іх жанчына ўкусіла. Цяпер ёй пагражае 5 гадоў
7 снежня ў судзе Ленінскага раёну Горадні пачаўся суд над Марынай Палікарпавай. 55-гадовую гарадзенку затрымалі 9 жніўня і збілі дзве супрацоўніцы АМАПу, адну з іх падчас збіцця гарадзенка ўкусіла. За гэта цяпер ёй пагражае да 5 гадоў пазбаўлення волі.
Пацярпелымі па справе праходзяць дзве супрацоўніцы міліцыі: прапаршчыцы Дар’я Бандарчук і Марыя Мазуркевіч. Вядзе справу суддзя Руслан Гурын, які вядомы тым, што па палітычных справах не вынес ні аднаго апраўдальнага прысуду.
Што здарылася
Вечарам 9 жніўня Марына Палікарпава гуляла ў цэнтры Горадні. Калі пачалася зачыстка Савецкай плошчы АМАПам, яна знаходзіліся побач, у скверы. Хацела выйсці да тралейбуснага прыпынку, але там яе прыпыніў супрацоўнік без формы і забраў у бус. Гарадзенку адвезлі да помніка Сакалоўскаму, дзе перасадзілі ў іншы бус. Тут яна і сустрэлася з двума дзеўчынамі з гарадзенскага АМАПу. Яны былі ў цывільным адзенні і медыцынскіх масках. Пасля слоўнай перапалкі яны пачалі яе біць. Абараняючыся ад прыёму здушэння, жанчына ўкусіла адну з супрацоўніц міліцыі.
Марына Палікарпава адседзела трое сутак у адзіночнай камеры нібыта за ўдзел у мітынгу. Пакармілі яе толькі на трэці дзень. У жанчыны пасля збіцця кружылася галава, апухла шыя, падскочыў ціск. У РАУСе ёй стала кепска, вызвалі хуткую для абследавання.
Зараз супраць Марыны Палікарпавай узбуджана крымінальная справа па артыкуле 364 КК (Гвалт або пагроза ў дачыненні да службовай асобы, якая выконвае службовыя абавязкі). Пакаранне па гэтым артыкуле прадугледжвае пазбаўленне волі тэрмінам да 5 гадоў.
Версія абвінавачвання
Згодна з абвінавачваннем, Марына Палікарпава вечарам 9 жніўня актыўна ўдзельнічала ў несанкцыянаванай акцыі пратэсту.
Пасля затрымання з мэтай збегчы з буса і перашкодзіць законнай дзейнасці супрацоўніц УУС яна наўмысна ўчыніла гвал да іх, укусіла Дарʼю Бандарчук за левую далонь, ударыла па твару Марыю Мазуркевіч.
Палікарпава віны не прызнала.
«Заткні еб***, с***!»
Па словах Марыны Палікарпавай, на плошчы вечарам 9 жніўня яна аказалася выпадкова. Пасля працы ў аптэцы яна пайшла на выбарчы ўчастак прагаласаваць, сустрэла там сяброўку і вырашыла разам з ёй прагуляцца ў цэнтр Горадні. Ад парку Жылібера яны ішлі па вуліцы Савецкай у бок прыпынку грамадскага транспарту. Каля Моладзевага цэнтру жанчыны развіталіся. Тут Марына Палікарпава сустрэла свайго брата, дамовіліся сустрэцца на прыпынку і паехаць дадому разам.
Жанчына пайшла наперад, падышла да плошчы і ўбачыла шмат людзей у чорнай вопратцы. Зразумела, што транспарт перакрыты і адʼехаць не атрымаецца. Адышла ў сквер каля плошчы, каб пачакаць брата і разам вырашыць, што рабіць далей. У гэты час пачалася зачыстка плошчы. Гарадзенка разгубілася, бо апынулася ў такой сітуацыі ўпершыню.
Побач стаяў міліцыянт. Яна запытала яго, як можна выйсці адсюль. Ён накіраваў яе на прыпынак. Там яе затрымаў чалавек у цывільным. Падчас затрымання ён сказаў падрыхтаваць пашпарт для складання пратаколу. Жанчына так спужалася, што без усякага супраціву села ў бус, думаючы, што яе павязуць у пастарунак для праверкі дакументаў. Калі яе перасадзілі ў бус з амапаўкамі, размова зноў зайшла пра пашпарт, і Палікарпава запытала, ці трэба ёй даваць свой дакумент. На што супрацоўніцы міліцыі адказалі «Заткні еб***, с***».
«Гэта сітуацыя мяне шакавала. Мяне абразілі. Я запытала, як гэта разумець? Якое яны маюць права казаць так? Я – сталая жанчына, гаджуся ім у маці».
Супрацоўніцам гэта не спадабалася і яны пачалі мяне біць, рукамі і нагамі. Спачатку Бандарчук ударыла кулаком у плячо і ў сцягно, каб я ўпала з крэсла. Пасля адзін удар прыйшоўся ў твар, разбілі мне акуляры. У мяне кепскі зрок, я цалкам згубіла арыентацыю ў прасторы«, – узгадвае Марына Палікарпава.
Па яе словах, на просьбу прадставіцца дзяўчыны адказалі: «Я – Маша Лукашэнка, а я – Наста Лукашэнка. Не заткнешся, мы на цябе кайданкі надзенем».
Жанчына з выклікам працягнула наперад рукі, маўляў, калі яны маюць на гэта права і яна такая небяспечная, то давайце. Кайданкі надзелі, але яны расшпіліліся на левай руцэ.
Марына Палікарпава вазьмі і скажы: «Не можаце нават кайданкі нармальна надзець». Гэта іх раззлавала.
«Яны пачалі ўдваіх мяне біць, куды траплялі, сказалі, што зараз апрануць кайданкі так, як мне спадабаецца. Я старалася левай рукой прыкрыць твар ад удараў, бо я працую ў аптэцы правізарам. Яшчэ думала, як жа я пайду на працу з разбітым тварам? Баялася, што зламаюць мне нос. Правай рукой адмахвалася. Яны абедзве на мяне наваліліся. Адна з амапавак, Бандарчук, хацела прамяніць да мяне ўдушальны прыём. Левай рукой пачала душыць, а правай хацела завярнуць маю руку назад. Я вельмі спужалася, да мяне ніколі не ўжывалі гвалт. Інстынктыўна я ўкусіла Бандарчук за руку», – распавядае Марына Палікарпава.
Далучылася Мазуркевіч, жанчыну скруцілі. Пасля гэтага амапаўкі паклікалі супрацоўніка ў міліцэйскай форме, які сядзеў у бусе спераду.
«Тут я адчула моцны ўдар зверху па патыліцы. Некалькі тыдняў я не магла павярнуць шыяй. Да гэтай пары ёсць болі. Мне зашпілілі кайданкі так, што з правай рукі пайшла кроў», – распавядае Марына Мікалаеўна.
Жанчыну даставілі ў Ленінскі РАУС.
«Усё пачалося з таго, што міліцыянткі груба мяне абразілі. Я зрабіла ім заўвагу, і ім гэта не спадабалася. Я да РАУСА нават дакладна не ведала, куды мяне вязуць, хто гэтыя дзяўчыны, толькі здагадвалася, што міліцыянткі. Мне ніхто не тлумачыў, што я затрыманая. Ні ў якіх мітынгах я не ўдзельнічала, не выкрыквала лозунгаў, сімволікі не мела», – распавядае Палікарпава.
Па яе словах, падчас вочнай стаўкі з міліцыянткамі на іх пашкоджанняў не было відаць, а сама яна «была ўся сіняя». Яна падала заяву ў праваахоўныя органы, каб узбудзілі крымінальную справу на міліцыянтак за тое, што яе збілі. Але справу так і не ўзбудзілі.
Мазуркевіч: Палікарпава мэтанакіравана ўдарыла мяне і ўкусіла калегу
На судзе амапаўка Мазуркевіч распавяла, што 9 жніўня да іх у службовую машыну пасадзілі Марыну Палікарпаву, каб адвезці яе ў РАУС за ўдзел у мітынгу.
Яна падкрэсліла, што міліцыянткі яе не абражалі, Бандарчук нават падала руку Палікарпавай, каб дапамагчы зайсці ў бус.
«Мы прадставіліся ёй, растлумачылі, што яна затрыманая па адміністрацыйнай справе. Марына Мікалаеўна пачала скандаліць, сказала, што нічога не парушала, што нікуды з намі не паедзе і некалькі разоў спрабавала пакінуць службовы аўтамабіль. Дастала тэлефон і хацела нас здымаць. Мы папярэдзілі, што здымаць нас нельга, і калі яна не супакоіцца, мы будзем вымушаныя прымяніць сілу і спецсродкі – кайданкі», – кажа Мазуркевіч.
Па яе словах, Марына Палікарпава пачала біцца, крычаць, мэтанакіравана ўдарыла яе ў твар, сцягнула з яе маску і падрапала лоб, укусіла Бандарчук за руку.
«Палікарпава спецыяльна ўзяла руку маёй калегі і ўкусіла. Пратрымала так каля хвіліны. Добра памятаю твар Бандарчук, на якім было здзіўленне і боль», – адзначае Мазуркевіч.
Амапаўкі заламілі Марыне Палікарпавай рукі і надзелі кайданкі. Пасля гэтага павезлі ў РАУС.
Падчас пытанняў адвакаткі Мазуркевіч пачала блытацца ў сваіх паказаннях і ў выніку шмат пра што «забыла» і шмат чаго «не бачыла». У судзе завісалі доўгія паўзы, калі амапаўка доўга не магла адказаць на пытанні.
«У той дзень на нас была вельмі вялікая фізічная і маральная нагрузка, таму штосьці магло не зафіксавацца ў памяці», – растлумачыла супярэчнасці Марыя Мазуркевіч.
Такія ж паказанні былі і ў яе калегі.
Міліцыянткі падалі пазоў на кампенсацыю маральнай шкоды ў памеры 5000 рублёў кожная.
Што вядома пра гарадзенскіх амапавак
Марыя Мазуркевіч, 1987 года нараджэння, выпускніца юрыдычнага факультэту Гарадзенскага дзяржаўнага ўніверсітэту імя Янкі Купалы. У 2016 годзе завочна скончыла магістратуру, цяпер вучыцца ў аспірантуры, піша кандыдацкую дысертацыю.
У АМАПе служыць з 2010 года. Муж Марыі, Дзяніс, працуе ў патрульна-паставой службе міліцыі Кастрычніцкага РАУС. Раней ён таксама быў АМАПаўцам. Сям’я выхоўвае дваіх дзяцей.
У сюжэце «Сіла і прыгажосць», які выйшаў у 2019 годзе, дзяўчына расказвае, што яе бацька быў ваенным, і ёй заўсёды хацелася пайсці па яго слядах.
Дар’я Бандарчук служыць у АМАПе 6 гадоў. У 2018 годзе, у гонар 30-гадовага юбілею беларускага АМАПу, яе ўзнагародзілі нагрудным знакам «За самаадданую службу» II ступені. Замужам.
У тым жа рэпартажы «Сіла і прыгажосць» распавядае, што марыла служыць менавіта ў АМАПе, і што «гэта яе ўсё».
Саша Праўдзіна, belsat.eu
