Беларускія студэнты збіраюцца патрабаваць рэальных рэформаў у адукацыі праз адмысловы марш, які навучэнцы збіраюцца правесці ў Менску ў сераду, 2-га снежня.
«Мы выходзім на марш студэнтаў, таму што хочам, каб на нас звярнулі ўвагу і пачулі наш пункт гледжання. Адміністрацыя БДУ не прызнае нашага існавання і той факт, што вялікая колькасць людзей выступае супраць яе рашэнняў», – распавёў Naviny.by актывіст руху «Студэнты супраць».
24 лістапада ў сацыяльнай сетцы «УКантакце» з’явілася паведамленне аб правядзенні ў Менску 2 снежня Маршу студэнтаў.
У звароце руху «Студэнты супраць» гаворыцца: «Студэнты, выкладчыкі, абітурыенты, бацькі і ўсе-ўсе, каму неабыякавая наша адукацыя! Прыходзьце ў сераду (02.12) на Марш студэнтаў, гэта наша магчымасць паказаць адміністрацыі ўніверсітэтаў і Міністэрству адукацыі, што мы патрабуем рэальных рэформаў у сферы вышэйшай адукацыі, а не спроб прыкрыць свае няўдачы «паборамі і штрафамі».
Як падкрэсліў актывіст руху «Студэнты супраць» – мэта маршу ў тым, каб меркаванне студэнтаў улічвалася пры прыняцці важных рашэнняў, а самакіраванне ва ўніверсітэце было рэальным. Актывісты руху настойваюць на паўнавартасным і роўным удзеле студэнтаў у кіраванні ўніверсітэтам.
Прадстаўнікі БДУ з руху «Студэнты супраць» лічаць, што ў іх няма іншага выбару, акрамя як сабрацца і заявіць пра свае правы публічна:
«Мы праводзім мерапрыемства, не звязанае з палітыкай, будзем выкарыстоўваць толькі студэнцкія сімвалы. Больш за тое, мы не дамо слова тым палітыкам, якія, магчыма, прыйдуць на марш. І яшчэ мы зробім спробу запрасіць на наша мерапрыемства адміністрацыю БДУ. Мы не будзем прасіць дазволу праводзіць марш у Менгарвыканкаму, бо мы плануем знаходзіцца ў вучэбны час на тэрыторыі свайго ўніверсітэту, дзе маем права быць».
Нягледзячы на тое, што студэнты БДУ сабралі больш за 2,5 тысячы подпісаў супраць увядзення платы за пераздачу залікаў і экзаменаў, такая плата ў універсітэце была ўведзена. Тым самым, лічаць «Студэнты супраць», адміністрацыя ВНУ праігнаравала меркаванне студэнтаў: «У нас не было рэальнай магчымасці ўплываць на гэтае рашэнне».
Каб звярнуць увагу на праблему, студэнты таксама пачалі збор подпісаў на сайце zvarot.by пад петыцыяй «Абараніце студэнтаў ад пабораў адміністрацыі!».
У петыцыі адзначаецца, што ўніверсітэты ўвялі так званыя «платныя дадатковыя паслугі»: «Цяпер студэнты абавязаныя плаціць за пераздачы і адпрацоўкі. Штрафы і санкцыі не матывуюць вучыцца. Замест правядзення рэформаў ВНУ ўводзяць сістэмы пабораў і пакаранняў. Выкладчыкі кажуць пра «квотах» людзей, якія павінны папоўніць бюджэт ВНУ. Універсітэты цяпер не акцэнтуюць увагу на якасці адукацыі, а спрабуюць згладзіць фінансавую безгрунтоўнасць. Мы можам гэта спыніць разам! Дапамажы спыніць разбурэнне вышэйшай адукацыі Беларусі!».
МЯ, паводле naviny.by
