Чалец ЦВК з правам дарадчага голасу ад Беларускай партыі левых «Справядлівы свет» Сяргей Калякін на паседжанні Цэнтральнай камісіі абвінаваціў яе ў перадузятасці.
Паводле Калякіна, пры дапамозе «бюракратычнай казуістыкі» акруговыя камісіі расчышчаюць палітычнае поле і не дапускаюць «не пажаданых уладзе асобаў да ўдзелу ў выбарчай кампаніі».
Гэтую заяву ён зрабіў падчас разгляду скаргі на адмову ў рэгістрацыі кандыдатам у дэпутаты моладзевага актывіста Артура Фінькевіча, які балатаваўся па Свіслацкай выбарчай акрузе № 94.
ЦВК пагадзілася з высновамі акруговай камісіі пра тое, што ў падпісных лістах Фінькевіча выяўленыя несапраўдныя подпісы, колькасці якіх дастаткова для адмовы ў рэгістрацыі кандыдатам у дэпутаты.
На думку яшчэ аднаго чальца Цэнтральнай камісіі з правам дарадчага голасу ад Аб’яднанай грамадзянскай партыі Віктара Карнеенкі, «акруговая камісія ў гэтым выпадку паступіла нядобрасумленна, у прыватнасці, не спрыяла вылучэнню прэтэндэнта ў якасці кандыдата ў дэпутаты».
«Акрамя таго, неабходна ўлічыць меркаванне эксперта-крыміналіста, пададзенае Фінькевічам, які ставіць пад сумнеў высновы камісіі аб несапраўднасці подпісаў. А сумневы трэба тлумачыць на карысць прэтэндэнта, а не супраць яго», – падкрэсліў Карнеенка.
belsat.eu