Адмена масачнага рэжыму, заява пра пазбаўленне грамадзянства. Галоўнае за тыдзень у малюнках
Мастак Дэ Лёс разам з belsat.eu узгадвае самыя рэзанансныя і абсурдныя падзеі апошніх дзён.
Міграцыйны крызіс на мяжы Беларусі і Еўразвязу, штучна створаны рэжымам Аляксандра Лукашэнкі, трывае ўжо пяць месяцаў. Крызіс распачаўся ў канцы траўня пасля скандалу з пасадкай самалёта Ryanair, які пацягнуў за сабой беспрэцэдэнтныя абмежавальныя захады з боку ЕЗ і ў тым ліку ўвядзенне сектаральных санкцыяў.
У гэтай сітуацыі рэжым Лукашэнкі даў зразумець, што разглядае міграцыйнае пытанне ў якасці механізму шантажу Еўразвязу і помсты за санкцыі. Аляксандр Лукашэнка паабяцаў, што цяпер заходнія краіны будуць вымушаныя самастойна «лавіць» мігрантаў. Уладзімір Макей прыгразіў скасаваць супрацу з ЕЗ у пытаннях нелегальнай міграцыі, «калі на Захадзе на адумаюцца».
Пасля гэтых заяваў стаў назірацца выбуховы рост нерэгулярнай міграцыі праз беларускую мяжу. Толькі польскія памежнікі за гэты час зафіксавалі больш за 20 тысяч спробаў незаконна трапіць у Еўразвяз.
Падраздзяленне МУС прапаноўвае пазбаўляць беларускага грамадзянства асобаў, прызнаных вінаватымі ў экстрэмізме, тэрарызме або злачынствах, якія прычыняюць шкоду інтарэсам Беларусі. Прапанову Вячаслава Арлоўскага з ГУБАЗіКу нельга назваць беспрэцэдэнтнай – аналагічныя нормы практыкаваліся ў Савецкім Саюзе і нацысцкай Нямеччыне.
Прадстаўнік офісу Святланы Ціханоўскай у юрыдычных пытаннях Сяргей Зікрацкі кажа «Белсату»: не мае сэнсу наогул звяртаць увагу на такія заявы, бо яны супярэчаць дзейнаму заканадаўству.
«Ёсць артыкул 10 Канстытуцыі, які прадугледжвае, што грамадзянін Беларусі не можа быць пазбаўлены грамадзянства, – кажа Зікрацкі. – Таму каб зрабіць тое, што яны абвясцілі, трэба спачатку памяняць Канстытуцыю. Я б не абмяркоўваў наступстваў такой прапановы, бо прапанова не мае пад сабой ніякага абгрунтавання».
Расейскі журналіст і галоўны рэдактар радыёстанцыі «Эхо Москвы» Аляксей Венядзіктаў запісаў інтэрв’ю са Святланай Ціханоўскай. У інтэрв’ю Святлана Ціханоўская расказала пра тое, што не плануе балатавацца на прэзідэнцтва на новых выбарах:
«У нас шмат вартых людзей, якія могуць узяць на сябе кіраўніцтва краінай. Таму мой адказ – не».
Таксама Ціханоўская выказалася пра эфектыўнасць заходніх санкцыяў супраць Лукашэнкі і ягонага атачэння:
«Яны [санкцыі] былі б нашмат больш эфектыўнымі, калі б прадстаўнікі рэжыму не маглі прыехаць і ўзяць крэдыты. Яны могуць. Таму давайце задамо пытанні прадстаўнікам Крамля: ці вартыя яны таго? <…> Трэба паказваць новага чалавека ва ўладзе, які будзе таксама паляпшаць нашыя гандлёвыя, эканамічныя адносіны з Расеяй. Я думаю, гэта будзе ўзаемавыгадная і адкрытая пазіцыя для ўсіх. Навошта ў Крамлі думаюць, што пасля Лукашэнкі ўсё будзе дрэнна? У нашых адносінах усё будзе яшчэ лепш».
Старшыня Беларускага аб’яднання рабочых Сяргей Дылеўскі абвесціў пачатак у Беларусі забастоўкі на 1 лістапада. Абяцаюць спыніць вытворчасць па ўсёй краіне, калі ўлады не выканаюць патрабаванняў БАР. Такая заява стала навіною не толькі для ўладаў, але і для іншых прадстаўнікоў дэмакратычнай супольнасці. Святлана Ціханоўская адзначыла: хоць пытанне страйку сапраўды хвалюе шмат якіх беларусаў, яе варта пачынаць толькі тады, калі будзе правядуць адпаведнае рыхтаванне.
У сувязі з рэзкім ростам колькасці інфікаваных каронавірусам і цяжарам на медыцыну ўлады пайшлі на крокі, якія б дазволілі зменшыць колькасць хворых і смяротнасць. Але Лукашэнка раскрытыкаваў гэтыя захады і заявіў, што міліцыянты, якія кантралююць масачны рэжым у краіне, «мацаюць усюды, нават жанчын не шкадуючы». Падчас нарады аб эпідэмічнай сітуацыі Лукашэнка востра раскрытыкаваў міністра аховы здароўя Дзмітрыя Піневіча за тое, што ведамства занялося супрацьдзеяннем распаўсюду каронавіруса. Адным з патрабаванняў Лукашэнкі стала вяртанне планавай медычнай дапамогі.
Абурыў Лукашэнку і масачны рэжым. Чамусьці ён сказаў, што міліцыянты напружваюць моцна людзей і «мацаюць усюды, нават жанчын не шкадуючы». Не зусім зразумела, што меў на ўвазе Лукашэнка і чаму ён лічыць, што падчас кантролю масачнага рэжыму міліцыянты мацаюць людзей. Але за гэта ён раскрытыкаваў міністра ўнутраных справаў Івана Кубракова.
Вядома, што нашэнне масак значна змяншае рызыку інфікавання і распаўсюду інфекцыі. Большасць краінаў свету ўвялі абавязковы масачны рэжым, калі пандэмія толькі набірала абароты. Тое ж датычыць і сацыяльнага дыстанцыявання. Вакцынацыя для некаторых групаў насельніцтва ў многіх краінах свету таксама стала абавязковай. Урады краінаў імкнуцца, каб у наяўнасці была надзейная вакцына супраць інфекцыі, прышчэпка якой робіцца бясплатна. У Беларусі сітуацыя з вакцынацыяй выглядае зусім не аптымістычна.
Малюнкі Дэ Лёс belsat.eu
