На паседжанні літоўскага клубу пры Саюзе стралкоў у Коўне 30 ліпеня было прынятае рашэнне стварыць міжнароднае падраздзяленне, у якое ўвойдуць замежнікі, у тым ліку і беларусы. Падраздзяленне будзе дзейнічаць як філіял пры Саюзе стралкоў Літвы.
Як адзначыў прэзідэнт Саюзу стралкоў Літвы Стасіс Ігнатавічус: «Цяпер у нас адзін вораг – як у літоўцаў, так і ў беларусаў: гэта рэжым Пуціна. І нам трэба змагацца супраць яго. Мы сустракаліся з беларусамі, якія хочуць разам з нашай арганізацыяй супрацьстаяць гэтаму злу, і таму стварылі міжнароднае падраздзяленне пры нашай арганізацыі».
Фармуецца падраздзяленне, якое ўпершыню прымае ў свае шэрагі замежнікаў. Каб тое стала магчымым, будзе зменены статут арганізацыі, і гэтыя змены замацуюць заканадаўча.
Саўлюс Пячалюнас, былы чалец Сейму, звярнуў увагу на супольную гісторыю.
«Душа Вялікага Княства Літоўскага – яна жывая, нашыя народы вельмі адчуваюць роднасць паміж сабой у цяжкіх сітуацыях. У 1920 годзе быў цэлы беларускі батальён у нашым войску, які змагаўся за незалежнасць пры баях з бальшавікамі. Такое падраздзяленне было, мы яго памятаем. Гэта гісторыя, якая ў некаторых іншых праявах вяртаецца. Яна нікуды не падзелася, гэтая гістарычная памяць яна ўсё ж існуе, трэба гэтым карыстацца, гэта наш здабытак», – заявіў Саўлюс Пячалюнас.
На паседжанні прысутнічалі беларусы, якія плануюць уступіць у гэтае падраздзяленне. У выпадку нападу Расеі на Літву беларусы змогуць абараняць краіну ў межах літоўскага падраздзялення тэрытарыяльнай абароны.
ГР belsat.eu