Марыя Калеснікава застаецца ў рэанімацыі ў цяжкім стане, але цяпер у прытомнасці. У гомельскую больніцу прыехаў ейны бацька, але дыягназ яму не раскрываюць. Паводле непацверджанай інфармацыі, у Марыі прабадная язва, паведамляецца ў Telegram-канале Віктара Бабарыкі.
У гомельскую больніцу, дзе цяпер ляжыць Марыя Калеснікава, прыехаў ейны бацька і адвакат. Але ім не дазволілі сустрэцца з ёю, паведамляе Telegram-канал Віктара Бабарыкі.
Лекары размаўляюць з Аляксандрам Калеснікавым у прысутнасці міліцыянтаў. Дыягназ назваць адмаўляюцца, спасылаючыся на тое, што Марыя не давала на тое пісьмовага дазволу. Паводле папярэдняй інфармацыі, у палітзняволенай прабадная язва.
Марыю прывезлі ў шпіталь у цяжкім стане. Калі ёй стала блага, невядома. Адваката не пускалі да яе ў калонію з 17 лістапада.
Аперацыя прайшла паспяхова, але Марыя ўсё яшчэ ў цяжкім стане. Дактары запэўнілі, што яна ў прытомнасці, неабходнае лячэнне і лекі атрымлівае.
Радыё «Свабода» раней паведаміла, што палітзняволеную ў больніцы ахоўваюць тры міліцыянты, адзін узброены аўтаматам.
Марыю Калеснікаву шпіталізавалі 28 лістапада.
Сяргей Крот belsat.eu