Аляксандр Лукашэнка ў інтэрв’ю Дзмітрыю Кісялёву заявіў, што Крым пасля рэферэндуму зʼяўляецца расейскім дэ-факта і дэ-юрэ, піша прэсавая служба Лукашэнкі.
Падчас інтэрвʼю Гендырэктару МІА «Россия сегодня» Дзмітрый Кісялёў запытаўся ў Лукашэнкі пра прыналежнасць Крыма.
«Мы ўсе разумелі, што Крым дэ-факта – гэта расейскі Крым. Пасля рэферэндуму і дэ-юрэ Крым стаў расейскім», – сказаў Лукашэнка.
Ён таксама распавёў, што збіраецца паехаць у Крым, у прыватнасці ў Севастопаль. Такім чынам, паводле словаў Лукашэнкі, візіт будзе азначаць прызнанне яго расейскай тэрыторыяй.
4 лістапада беларускі дэпутат Андрэй Савіных заявіў, што Беларусь фактычна прызнала Крым расейскім. Украіна ў сваю чаргу назірае за выказваннямі беларускіх чыноўнікаў у справе прыналежнасці Крыма. Кіеў пры гэтым пагражае афіцыйнаму Менску санкцыямі, калі той прызнае Крым расейскім.
АЯ belsat.eu