У міністэрстве замежных справаў Беларусі кажуць, што не маюць звестак пра беларусаў, што пацярпелі ў цісканіне ў Сеуле. Як запэўнілі ў МЗС, амбасада кантактуе з праваахоўнымі і медычнымі ўстановамі Паўднёвай Карэі, піша «БелТА».
У міністэрстве замежных справаў Беларусі заявілі, што не атрымлівалі інфармацыі пра беларусаў сярод загінулых і пацярпелых пасля цісканіны ў Сеуле.
«Амбасада падтрымлівае кантакт з праваахоўнымі органамі Карэі, медычнымі ўстановамі Сеула», – гаворыцца ў паведамленні.
На сваёй старонцы ў Facebook МЗС звярнулася да беларусаў, што зараз знаходзяцца ў Паўднёвай Карэі, з просьбай паведаміць пра сябе сваякам ці знаёмым. Тым, хто не можа знайсці сваіх родных у Карэі, параілі званіць у адмысловы кол-цэнтр.
Цісканіна адбылася ў раёне Ітхэвон, дзе на святкаванне Гэлаўіну сабраліся блізу 100 тысяч маладзёнаў. Натоўп апынуўся на вузкай вуліцы. Лік ахвяр дасягнуў 153, большасць з іх – дзеўчыны.
Сярод ахвяр – 19 замежнікаў: грамадзяне Ірану, Кітая, Нарвегіі, Расеі і Узбекістана.
У краіне абвешчаная нацыянальная жалоба.
Сяргей Крот belsat.eu