Паліцыя затрымала 60-гадовага мужчыну, якога западозрылі ў датычнасці да спілоўвання ў Англіі белага клёна, што стаўся вядомы дзякуючы фільму пра Робін Гуда. Першы фігурант справы – 16-гадовы падлетак, піша «The Guardian».
Інцыдэнт адбыўся ўначы 28 верасня ў графстве Нортамбэрлэнд на поўначы Англіі. Здарэнне назвалі «наўмысным актам вандалізму».
Паліцэйскае расследаванне прывяло да 16-гадовага падлетка. Пасля допыту яго вызвалілі пад заклад. Матывы дзеянняў хлопца не разгалошваюцца.
Пазней паліцыя арыштавала другога падазраванага – 60-гадовага мужчыну. Паведамляецца, што ён «дапамагае афіцэрам у расследаванні». Аднак пра матывы зламыснікаў дагэтуль інфармацыі няма.
Гэты клён рос на тэрыторыі нацыянальнага парка Нортамбэрлэнд. Дрэву было каля 200 гадоў. Жыхары кажуць, што яно было «часткаю калектыўнай душы». Каля клёна пакідалі памятныя каменьчыкі з надпісамі, развейвалі прах памерлых, звалі замуж, ладзілі сямейныя пікнікі.
«Гэтае дрэва суправаджала мяне ўсё маё жыццё. Бачыць яго ссечаным – усё роўна што ў апошні раз развітацца з сябрам», – кажуць тутэйшыя.
Шмат каму клён вядомы з фільму «Робін Гуд – Прынц злодзеяў» 1991 года.
Сяргей Крот belsat.eu