Прэзідэнт Расеі Уладзімір Пуцін 30 траўня падпісаў указ аб спрошчаным парадку прыёму ў грамадзянства РФ дзяцей-сіротаў з самаабвешчаных ДНР і ЛНР, а таксама з Украіны.
Указ апублікаваны на афіцыйным партале прававой інфармацыі Расеі.
У дакуменце сказана, што «дзеці-сіроты і дзеці, якія засталіся без апекі бацькоў, недзеяздольныя асобы, якія ёсць грамадзянамі Данецкай Народнай Рэспублікі, Луганскай Народнай Рэспублікі або Украіны, набываюць грамадзянства Расейскай Федэрацыі ў спрошчаным парадку».
Звярнуцца з просьбай надаць дзіцяці расейскае грамадзянства можа ягоны апякун, які мае грамадзянства Расеі, Украіны ці самаабвешчаных Данецкай ці Луганскай народных рэспублік. З такой просьбай таксама могуць звяртацца арганізацыі, што займаюцца дзецьмі-сіротамі.
Раней быў падпісаны ўказ аб спрошчаным парадку атрымання грамадзянства Расейскай Федэрацыі для жыхароў Запарожскай і Херсонскай вобласцяў Украіны нароўні з жыхарамі самаабвешчаных ДНР і ЛНР.
Алена Рувіна belsat.eu