Telegram-канал «Беларускі Гаюн» паведаміў пра знойдзеныя абломкі ракеты на полі каля вёскі Гарбаха ў Іванаўскім раёне Берасцейскай вобласці. Жыхары раённага цэнтру распавялі «Белсату», што адчулі выбух.
На полі каля вёскі Гарбаха ў Іванаўскім раёне Берасцейскай вобласці знайшлі абломкі ракеты. Улады адразу ж паведамілі, што гэта ўкраінская ракета.
Вёска Гарбаха размяшчаецца на адлегласці каля 15 кіламетраў ад Іванава. Але нягледзячы на такую адлегласць выбух чулі і жыхары раённага цэнтру.
Жыхары Іванава распавядаюць, што чулі нейкі гук, падобны на выбух. Але цяпер у горадзе нічога надзвычайнага няма. Многія проста не зразумелі, што адбываецца. Іначай было ў раёнах, бліжэйшых да вёскі. Людзі кажуць не толькі пра гучны выбух, але і пра тое, што сцены дамоў трэсліся ад гукавой хвалі.
Іншыя суразмоўцы «Белсату» з Іванава распавядаюць, што чулі нават некалькі выбухаў.
«Так, сапраўды, чулі, што ўпала ракета. Мы чулі некалькі выбухаў. Адзін быў вельмі магутны, а два пазней былі цішэйшыя. Гэта было прыкладна каля 10:30.
Гэта ўсё адбылося ў суседняй вёсцы. Жыхароў вёскі, якія непадалёку жывуць, эвакуявалі адтуль, працуюць следчыя», – кажуць жыхары Іванава.
Алена Аляксандрава belsat.eu
